ବଦଳିଯିବ ବିଜେଡ଼ିର ବହୁ ବରିଷ୍ଠଙ୍କ ଆସନ …ଉପକୂଳରେ ବହୁ ଆସନରେ ହେବ ପରିବର୍ତ୍ତନ …

ଭୁବନେଶ୍ୱର : ବିଜୁ ଜନତା ଦଳ ଚଳିତ ସାଧାରଣ ନିର୍ବାଚନରେ ବହୁ ଗୁରୁତ୍ୱପୂର୍ଣ୍ଣ ଆସନରେ ପ୍ରାର୍ଥୀ ବଦଳ କରିବାକୁ ମନସ୍ଥ କରିସାରିଛି। ଏନେଇ କେତେକ ନେତାଙ୍କୁ ସବୁଜ ସଙ୍କେତ ଦିଆଯାଇସାରିଲାଣି। କେତେକ ସ୍ଥାନର ଛାମୁଆ ନେତୃତ୍ୱଙ୍କୁ ଡାକି ମଧ୍ୟ ଶଙ୍ଖ ଭବନରେ ନିୟମିତ ଅବଗତ କରାଯାଉଛି। ଗତଥର ଖୋର୍ଦ୍ଧା, ଚିଲିକା, ବେଗୁନିଆ, କେନ୍ଦ୍ରାପଡ଼ା, ଝରିଗାଁରେ ଏହି ଯୋଜନା ସଫଳ ହୋଇଥିଲା। ଚଳିତ ଥର ବଡ଼ ଧରଣର ଅଦଳବଦଳ ଆଶା କରାଯାଉଛି।ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୂଳ ଆସନ ହିଞ୍ଜିଳି ସହ ପୁରୀ, ବାରବାଟୀ-କଟକ କିମ୍ବା ନର୍ଲାରୁ ଲଢିପାରନ୍ତି ବୋଲି ଚର୍ଚ୍ଚା ଜୋର ଧରିଛି। ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଯାଜପୁର ନ ଲଢି କୋରେଇ କିମ୍ବା ସମ୍ବଲପୁର ଲୋକସଭା ଲଢିବା କଛା ଉଠୁଛି। ପୁଷ୍ପେନ୍ଦ୍ର ସିଂ ଦେଓ କଳାହାଣ୍ଡି ଲୋକସଭା ବଦଳରେ ଧର୍ମଗଡ଼,  କଳିକେଶ ନାରାୟଣ ସିଂ ଦେଓ ବଲାଙ୍ଗୀର ଲୋକସଭା ବଦଳରେ ସ୍ଥାନୀୟ ବିଧାନସଭା, ଗୃହରାଷ୍ଟ୍ର ମନ୍ତ୍ରୀ ତୁଷାରକାନ୍ତି ବେହେରା କାକଟପୁର ବଦଳରେ ଜଗତସିଂହପୁର ଲୋକସଭା, ଜଗତସିଂହପୁର ଏମପି ରାଜଶ୍ରୀ ମଲ୍ଲିକ ପୂର୍ବ ଆସନ ତିର୍ତ୍ତୋଲରୁ ଲଢିବା ପାଇଁ ଆଗ୍ରହ ପ୍ରକାଶ କରିଛନ୍ତି। ଯାଜପୁର ଲୋକସଭା ପ୍ରାର୍ଥୀ ହୋଇପାରନ୍ତି ବିଧାୟିକା ପ୍ରମିଳା ମଲ୍ଲିକ। ଏମପି ଥିବା ଶର୍ମିଷ୍ଠା ବିଂଝାରପୁର ଆସନରୁ ଲଢି ପାରନ୍ତି ବୋଲି କୁହାଯାଉଛି। ରେଢାଖୋଲ ବିଧାୟକ ରୋହିତ ପୂଜାରୀ ସମ୍ବଲପୁର, ସମ୍ବଲପୁର ଲୋକସଭା ଲଢିଥିବା ନଳିନୀକାନ୍ତ ପ୍ରଧାନ ଚଳିତ ଥର ଆଠମଲ୍ଲିକରୁ ପ୍ରାର୍ଥୀ ହେବେ ବୋଲି ଜଣାପଡିଛି। କେନ୍ଦ୍ରାପଡ଼ା ଜିଲ୍ଲାରେ ଅଂଶୁମାନ ରାଜନଗର ଛାଡି ସ୍ଥାନୀୟ ଲୋକସଭା ଲଢିପାରନ୍ତି। ବିଜୟ ମହାପାତ୍ରଙ୍କ ପୁଅ ଅରବିନ୍ଦ ମହାପାତ୍ର ଯଦି ବିଜେଡି ଆସନ୍ତି, ତେବେ ସେ ମହାକାଳପଡ଼ା ଲଢିଲେ  ଅତନୁ ସବ୍ୟସାଚୀ ନାୟକ ପଡୋଶୀ ପାଟକୁରାରୁ ଲଢିବାର ସମ୍ଭାବନା ରହିଛି। ମାହାଙ୍ଗାରୁ ପ୍ରତାପ ଜେନା ସାଲେପୁର ଲଢିବାର ସମ୍ଭାବନାକୁ ମଧ୍ୟ ଏଡାଇ ଦିଆଯାଇ ନପାରେ। ପୁରୀ ଲୋକସଭା ଦୃଷ୍ଟିରୁ ଅରୁଣ ସାହୁଙ୍କୁ ରଣପୁର ଲଢାଇବାକୁ ମଧ୍ୟ ବିଚାରବିମର୍ଶ କରାଯାଉଛି। ପୁରୀ ଜିଲ୍ଲାରେ ବ୍ରହ୍ମଗିରୀରୁ ଲଢିଥିବା ସଞ୍ଜୟ ଦାସବର୍ମା ସତ୍ୟବାଦୀ କିମ୍ବା ଭୁବନେଶ୍ୱର ମଧ୍ୟରେ ଭାଗ୍ୟ କରିପାରନ୍ତି ବୋଲି ଜଣାପଡିଛି।