କାହିଁକି ଏମିତି କହିଲେ ଧର୍ମେନ୍ଦ୍ର, ବିଜେଡ଼ି କ’ଣ ଏତେ ସଂଖ୍ୟକ ଲୋକସଭା ଆସନ ହରାଇବ !

ଭୁବନେଶ୍ୱର : କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆସନ୍ତା ସାଧାରଣ ନିର୍ବାଚନରେ ଲୋକସଭା ଲଢିବାକୁ ଯାଉଛନ୍ତି।  ସେ ଢେଙ୍କାନାଳ ଲୋକସଭା କିମ୍ବା ସମ୍ବଲପୁର ଲୋକସଭାରୁ ପ୍ରାର୍ଥୀ ହୋଇପାରନ୍ତି ବୋଲି ରାଜନୈତିକ ମହଲରେ ଆଲୋଚନା ହେଉଛି। ଏହି ଦୁଇ ଆସନ ମଧ୍ୟରୁ କୌଣସି ଗୋଟିଏରେ ଲଢିବା ପାଇଁ ତାଙ୍କୁ ନିକଟରେ ସବୁଜ ସଙ୍କେତ ମିଳିସାରିଛି। ମାତ୍ର ରାଜନୈତିକ ବାତାବରଣକୁ ଉଷ୍ମ ରଖିବାକୁ ସେ ଉଭୟ ସମ୍ବଲପୁର ଏବଂ ଢେଙ୍କାନାଳ ଲୋକସଭା କ୍ଷେତ୍ରରେ କାର୍ଯ୍ୟ କରୁଛନ୍ତି। ଓଡ଼ିଶାର ଲୋକସଭା ଫଳାଫଳକୁ ନେଇ ଶ୍ରୀ ପ୍ରଧାନ ବେଶ୍ ଉତ୍ସାହିତ ରହିଛନ୍ତି। ଗଣମାଧ୍ୟମକୁ ମତାମତ ଦେଇ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ବିଜେପି ଓଡ଼ିଶାରୁ ୧୫ରୁ ଉର୍ଦ୍ଧ୍ୱ ଲୋକସଭା ଆସନ ଜିତିବାକୁ ଯାଉଛି। ୨୦୧୪ରେ ବିଜେପି ୨୨ % ଭୋଟ ପାଇଥିଲା। ଯାହା ୨୦୧୯ରେ ୩୮ %କୁ ବୃଦ୍ଧି ପାଇଥିଲା। ଆଗାମୀ ଦିନରେ ଏହି ଭୋଟ ପ୍ରତିଶତ ୪୫ %କୁ ବୃଦ୍ଧି ପାଇବ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚଳିତ ମାସ ୨୪ ତାରିଖରେ ସମ୍ବଲପୁର ଗସ୍ତ କରିବାର କାର୍ଯ୍ୟକ୍ରମ ରହିଛି। ଆଇଆଇଏମ-ଏସ୍ ଏକ ଉଦଘାଟନ କାର୍ଯ୍ୟକ୍ରମରେ ସେ ଯୋଗ ଦେବେ। ଏଥିସହିତ ଏକ ରାଜନୈତିକ ସଭା କିମ୍ବା କର୍ମୀମାନଙ୍କ ସହ ଆଲୋଚନା କରିବାକୁ ମଧ୍ୟ ପ୍ରସ୍ତାବ ରଖାଯାଇଛି। କିଛିଦିନ ପରେ ଏନେଇ ସ୍ପଷ୍ଟତା ଆସିବାକୁ ଯାଉଛି। ସାଧାରଣ ନିର୍ବାଚନକୁ ବହୁତ କମ୍ ସମୟ ଥିବାରୁ ମୋଦିଙ୍କ ସମ୍ବଲପୁର ଗସ୍ତ ବେଶ୍ ଚର୍ଚ୍ଚାର କାରଣ ହୋଇଛି। ଏହି ଗସ୍ତ ଶ୍ରୀ ପ୍ରଧାନଙ୍କ ସମ୍ବଲପୁର ଲଢେଇର ଭିତ୍ତି ପକାଇବ ବୋଲି କେତେକ ବିଜେପି ନେତା ପୂର୍ବାନୁମାନ କରିଛନ୍ତି।