ନବୀନ ସିନା ବିଜେପୁର ରୀତାଙ୍କ ପାଇଁ ଛାଡ଼ିଥିଲେ.. ପୁରୀରୁ ଜିତିଲେ କାହା ପାଇଁ ଛାଡ଼ିବେ ଆସନ……..

ଭୁବନେଶ୍ୱର : (ଲେଖାଟି ଟିକେ ଦୀର୍ଘ ଧୈର୍ଯ୍ୟର ସହ ପଢିବେ ) ପୁରୀ ଜିଲ୍ଲାର ପୁରୀ ସଦର ବିଧାନସଭା ଆସନରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଧାୟକ ପ୍ରାର୍ଥୀ ହେବେ। ନିଜ ଗଞ୍ଜାମ ଜିଲ୍ଲା ହିଞ୍ଜିଳି ଆସନ ପରେ ଏହା ତାଙ୍କର ଦ୍ୱିତୀୟ ଆସନ ହେବ। ପଞ୍ଚମ ପାଳିରେ ବହୁ ପ୍ରତୀକ୍ଷିତ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଉଦଘାଟନ କରାଯାଇଛି। ଏହି ପ୍ରକଳ୍ପ ମୁଖ୍ୟମନ୍ତ୍ରୀ ବିଶେଷ ଗୁରୁତ୍ୱ ଦେଇ ଆସୁଛନ୍ତି। ପ୍ରତି ଶନିବାର ନବୀନ ପଟ୍ଟନାୟକଙ୍କ ସବୁଠୁ ନିକଟତମ ରାଜନୈତିକ ବ୍ୟକ୍ତି ଭି.କେ ପାଣ୍ଡିଆନ୍ ପୁରୀ ଗସ୍ତ କରୁଛନ୍ତି। ମୁଖ୍ୟମନ୍ତ୍ରୀଙ୍କୁ ପୁରୀରେ ଲଢିବାକୁ କହିବୁ ବୋଲି ପୂର୍ବରୁ ଜଣେ ବିଜେଡି ନେତା ମତ ଦେଇସାରିଛନ୍ତି। ଏମିତି ବି ବିଜେଡି ଭିତରେ ପ୍ରବଳ ଗୋଷ୍ଠୀ କନ୍ଦଳ ରହିଛି। ତେଣୁ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ପୁରୀରୁ ଲଢିବାକୁ ରାଜନୈତିକ ସମୀକ୍ଷକମାନେ ଅଯୌକ୍ତିକ ମନେ କରୁନାହାନ୍ତି।

2024 ସାଧାରଣ ନିର୍ବାଚନରେ ନବୀନ ପୁରୀରୁ ଛିଡ଼ା ହୋଇ ଅକ୍ଲେଶରେ ଜିତି ଯିବେ। ମାତ୍ର ହିଞ୍ଜିଳି ରଖି ତାଙ୍କୁ ପୁରୀ ଆସନ ହିଁ ଛାଡିବାକୁ ପଡିବ। କାରଣ ଗଞ୍ଜାମ ଜିଲ୍ଲା ହିଞ୍ଜିଳି ସମେତ ଅନ୍ୟ ଆସନର ସ୍ଥିତି ଭଲ ନାହିଁ। ତେଣୁ ନବୀନ ପଟ୍ଟନାୟକ ପାରମ୍ପରିକ ଭାବେ ହିଞ୍ଜିଳି ଆସନ ଛାଡିବେ ନାହିଁ। ତେଣୁ ପୁରୀ ଆସନ ଯଦି ଛାଡିବେ, ତେବେ କାହାକୁ ଦେବେ, ସେ ନେଇ ବଡ଼ଦାଣ୍ଡରେ ଖଟି ଜମିବାରେ ଲାଗିଛି।  ପୁରୀ ବିଜେଡିର ଗୋଟିଏ ଗୋଷ୍ଠୀ ସ୍ୱର୍ଗତ ମହେଶ୍ୱର ମହାନ୍ତିଙ୍କ ପରିବାର ଦ୍ୱାରା ପରିଚାଳିତ। ଏହାକୁ ବର୍ତ୍ତମାନ ତାଙ୍କ ପୁତ୍ର ସୁନୀଲ ମହାନ୍ତି ପରିଚାଳନା କରୁଛନ୍ତି। ପୂର୍ବତନ କର୍ପୋରେଟର, ସରପଞ୍ଚ ଏବଂ କିଛି ଜିଲ୍ଲା ବିଜେଡି କାର୍ଯ୍ୟକର୍ତ୍ତା ଏହି ଗୋଷ୍ଠୀରେ ରହିଛନ୍ତି। ସୁନୀଲ ମହାନ୍ତି ଜଣେ ବିଜେଡି ଟିକେଟ୍ ଆଶାୟୀ। ରାଜ୍ୟର ଗୋଟିଏ ବିଶିଷ୍ଟ ବ୍ୟବସାୟୀ ପରିବାର ସହ ସମ୍ବଦ୍ଧ ମଧ୍ୟ ତାଙ୍କ ପ୍ରାର୍ଥୀତ୍ୱ ଦାବିକୁ ମଜଭୁତ୍ କରୁଛି। ଅପରପକ୍ଷରେ ମହେଶ୍ୱର ପରିବାର ବିରୋଧରେ ମଧ୍ୟ ଏକ ଭୋଟ୍ ବ୍ୟାଙ୍କ୍ ରହିଛି। ଏହା ଶୁଭାଶିଷ ଖୁଣ୍ଟିଆ ଏବଂ ବର୍ତ୍ତମାନ ବିଧାୟକ ଜୟନ୍ତ ଷଡଙ୍ଗୀଙ୍କ ପାଖରେ ରହିଛି। ଏଯାବତ୍ ସଦର ବ୍ଲକ ଅଧ୍ୟକ୍ଷ ଦିବାକର ପାତ୍ର ମହାନ୍ତି ପରିବାର ସହ ସିଧା ଉପରକୁ ଜଣା ପଡୁଛି। ହେଲେ ରାଜନୀତିରେ ଭାର୍ଗବୀ ନଦୀ ପାଣି କୁଆଡେ ଯିବ, ସେ କଥା ନିର୍ବାଚନ ଆସିଲେ ଜଣାପଡିବ ବୋଲି ସଦରରେ ଟୁପୁରୁଟାପୁରୁ ଚାଲିଛି।

ଅନୁରୂପ ଭାବେ ଦ୍ୱିତୀୟ ଦାବିଦାର ଭାବେ ଶୁଭାଶିଷ ଖୁଣ୍ଟିଆ ରହିଛନ୍ତି। ଶୁଭାଶିଷ ଅଣ-ମହେଶ୍ୱର ବିଜେଡି ରାଜନୀତିର ଚେହେରା ଭାବେ ଉଭା ହୋଇଛନ୍ତି। ସ୍ୱର୍ଗତ ମହେଶ୍ୱରଙ୍କ ପୁରୁଣା ସହଯୋଗୀଙ୍କୁ ନିଜ ଗୋଷ୍ଠୀକୁ ଆଣି ସାରିଛନ୍ତି। ସମାନ୍ତରାଳ ଭାବେ କାର୍ଯ୍ୟକ୍ରମ ଜାରି ରଖିଥିଲେ। ମହେଶ୍ୱରଙ୍କ ମୃତ୍ୟୁ ପରେ ଏବଂ ପରିକ୍ରମା ପ୍ରକଳ୍ପର ଲୋକାର୍ପଣକୁ ଦେଖି ଏହି ତିକ୍ତତା ବର୍ତ୍ତମାନ ହ୍ରାସ ହୋଇଥିବା ଏକ ବାର୍ତ୍ତା ଯାଇଛି। ସ୍ଥାନୀୟ ଲୋକଙ୍କ କହିବାନୁଯାୟୀ, ଶୁଭାଶିଷ ପ୍ରାର୍ଥୀ ନ ହୋଇଲେ ଗୋଟିଏ ଭୋଟ ବ୍ୟାଙ୍କ୍ ଦ୍ୱାରା ସମୀକରଣକୁ ବଦଳାଇ ଦେଇପାରନ୍ତି। ଶୁଭାଶିଷଙ୍କ ବିରୋଧରେ ମଧ୍ୟ ଗୋଟିଏ ଗୋଷ୍ଠୀ ରହିଛି। ଏହି ଗୋଷ୍ଠୀରେ ସ୍ୱର୍ଗତ ମହେଶ୍ୱରଙ୍କ ପରିବାର, ସଦର ବ୍ଲକ ଅଧ୍ୟକ୍ଷ ଦିବାକର ପାତ୍ର, ବର୍ତ୍ତମାନ ବିଧାୟକ ଜୟନ୍ତ ଷଡଙ୍ଗୀ ରହିଛନ୍ତି।

ତୃତୀୟ ଦାବିଦାର ଭାବେ ପୁରୀ ସଦର ବ୍ଲକ ଅଧ୍ୟକ୍ଷ ଦିବାକର ପାତ୍ର ରହିଛନ୍ତି। ୨୨ଟି ପଞ୍ଚାୟତରେ ଦିବାକରଙ୍କ ନିଜସ୍ୱ ଭୋଟ ବ୍ୟାଙ୍କ୍ ରହିଛି। ବ୍ରହ୍ମଗିରୀ ନିର୍ବାଚନମଣ୍ଡଳୀରେ ମିଶିଥିବା ୧୧ ପଞ୍ଚାୟତରେ ମଧ୍ୟ ଦିବାକର ପାତ୍ରଙ୍କ ପ୍ରଭାବ ରହିଛି। ଦଳର ସଙ୍ଗଠନରେ ସର୍ବାଧିକ ଭୋଟ୍ ବ୍ୟାଙ୍କ୍ ବାବୁଙ୍କ ପାଖରେ ରହିଛି। ପୂର୍ବରୁ ସରପଞ୍ଚ, ସମିତି ସଭ୍ୟ, ବ୍ଲକ ଅଧ୍ୟକ୍ଷ, ଜିଲ୍ଲା ପରିଷଦ ଅଧ୍ୟକ୍ଷ ହୋଇସାରିଛନ୍ତି। କୀଚକ ବାହୁ ବଳେ ବିରାଟ ରାଜା ବୋଲି ଲୋକ କଥା ରହିଛି। ପୁରୀ ସଦର ରାଜନୀତିରେ ସ୍ୱର୍ଗତ ମହେଶ୍ୱର ବିରାଟ ହେଲେ ଦିବାକର କୀଚକ ସଦୃଶ। ଶୁଭାଶିଷଙ୍କ ପରି ପୁରୀ ଏମପି ପିନାକୀ ମିଶ୍ର ସହିତ ଦିବାକର ପାତ୍ରଙ୍କ ସମ୍ପର୍କ ଭଲ। ତେଣୁ ଦିବାକର ପାତ୍ର ମଧ୍ୟ ଜଣେ ଟିକେଟ୍ ଦାବିଦାର। ନଚେତ ସଦର ସମୀକରଣ ବିଗାଡିବାକୁ ଦିବାକରଙ୍କ ଦୁଇ ଡର୍ଜନ ଫୋନ୍ କଲ ଏବଂ କିଛି କଡ଼ା ପାନ ଯଥେଷ୍ଟ ବୋଲି ଚାରଶ୍ରୀର ଜଣେ ଯୁବକ କହିଛନ୍ତି।

ଏହି ତିନି ଜଣଙ୍କୁ ବାଦ୍ ଦେଲା ପରେ ବିଜେପି ନେତା ତଥା ବର୍ତ୍ତମାନ ବିଧାୟକ ଜୟନ୍ତ ଷଡଙ୍ଗୀ ମଧ୍ୟ ବିଜେଡି ଟିକେଟ୍ ଆଶାୟୀ।  ପୁରୀ ସହରରେ ତାଙ୍କର ସ୍ୱତନ୍ତ୍ର ସଙ୍ଗଠନ ରହିଛି। ନବୀନ ପୁରୀରୁ ଲଢିଲେ ତାଙ୍କୁ ପ୍ରତିଶ୍ରୁତି ଦିଆଯାଇ ବିଜେଡିରେ ସାମିଲ କରାଯାଇପାରେ। ବିଜେଡିର ପୁରୁଣା ଲୋକ ହୋଇଥିବାରୁ ଘରପୁଅ ଘରକୁ ଫେରିଲା ନ୍ୟାୟରେ ଜୟନ୍ତ ବିଜେଡିରେ ସାମିଲ ହୋଇପାରନ୍ତି। ମାତ୍ର ଉପରୋକ୍ତ ଆଲୋଚିତ ତିନି ନେତାଙ୍କ ପରି ଜୟନ୍ତଙ୍କ ବିରୋଧରେ ମଧ୍ୟ ଭୋଟ୍ ବ୍ୟାଙ୍କ୍ ରହିଛି। ପୁରୀ ରାଜନୀତିରେ ମହେଶ୍ୱର ପରିବାର ଏବଂ ଦିବାକର ପାତ୍ର ଶ୍ରୀ ଷଡଙ୍ଗୀ ଘୋର ବିରୋଧୀ ବୋଲି ଅନେକେ ମତ ଦେଇଛନ୍ତି।  ତେଣୁ ସୁନୀଲ ମହାନ୍ତି-ବିଷ୍ଣୁପ୍ରିୟା ମହାନ୍ତି-ଶୁଭାଶିଷ ଖୁଣ୍ଟିଆ-ଦିବାକର ପାତ୍ର-ଜୟନ୍ତ ଷଡଙ୍ଗୀ କଳିରୁ ବଞ୍ଚିବା ପାଇଁ ମୁଖ୍ୟମନ୍ତ୍ରୀ ନିଜେ ପ୍ରାର୍ଥୀ ହୋଇପାରନ୍ତି। ହେଲେ ଆସନ ଛାଡିଲେ କାହାରିକୁ ଛାଡିବେ ବୋଲି ଚର୍ଚ୍ଚା ଆରମ୍ଭ ହୋଇଯାଇଛି। ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପରେ ପୁରୀ ଆସନ ବିଜେଡି ପାଇଁ ସମ୍ମାନର ପ୍ରଶ୍ନ ହୋଇଛି। ତେଣୁ ରାଜ୍ୟ ରାଜନୀତି ସହ ପୁରୀ ରାଜନୀତି ଆଗକୁ ଜମିବାକୁ ଯାଉଛି।