ଅପରାଜିତା-ଶ୍ରୀମୟୀଙ୍କୁ ଟକ୍କର ଦେଇପାରିବେ କି ନିରଞ୍ଜନ ? ପ୍ରାର୍ଥୀ ହେବେ ନା ଗଳା ବାଟ ଦେଖିବେ …

ଭୁବନେଶ୍ୱର :  ବିଜେପିର ଆଠଟି ଲୋକସଭା ଆସନ ଓଡ଼ିଶାରେ ରହିଛି। ଉପକୂଳ ଓଡ଼ିଶାରୁ ତନ୍ମଧ୍ୟରୁ ଦୁଇଟି। ଏହି ଆସନ ହେଉଛି ରାଜଧାନୀ ଭୁବନେଶ୍ୱର ଏବଂ ବାଲେଶ୍ୱର। ବିଜେପିର ଲୋକସଭା ଆସନ ହ୍ରାସ କରିବା କଂଗ୍ରେସ ପାଇଁ ପ୍ରାଥମିକତା ହୋଇଛି। ତେଣୁ ଆଗାମୀ ସାଧାରଣ ନିର୍ବାଚନରେ ଭୁବନେଶ୍ୱର ଲୋକସଭାରୁ କଂଗ୍ରେସ ଶକ୍ତିଶାଳୀ ପ୍ରାର୍ଥୀତ୍ୱ ଜାହିର କରିବାକୁ ଚାହୁଁଛି। ଏହି କ୍ରମରେ ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ ଭୁବନେଶ୍ୱର ଲୋକସଭାରୁ ପ୍ରାର୍ଥୀ ହୁଅନ୍ତୁ ବୋଲି ଏଆଇସିସିର ଏକ ସର୍ଭେ ଟିମ୍ ରିପୋର୍ଟ ଦେଇଛି। ନିରଞ୍ଜନ ପଟ୍ଟନାୟକଙ୍କ ପ୍ରଭାବ ବେଗୁନିଆ, ଜଟଣୀ ଠାରୁ ଆରମ୍ଭ କରି ଭୁବନେଶ୍ୱର ଓ ଏହାର ଉପକଣ୍ଠ ବାଲିଅନ୍ତା-ବାଲିପାଟଣା ଅଞ୍ଚଳରେ ରହିଛି। ପୂର୍ବରୁ ତାଙ୍କ ସାନ ଭାଇ ସୌମ୍ୟ ରଞ୍ଜନ ପଟ୍ଟନାୟକ ଏହି ଆସନରୁ କଂଗ୍ରେସ ଟିକେଟ୍ ବିଜୟୀ ହୋଇସାରିଛନ୍ତି। ଭୁବନେଶ୍ୱର ଲୋକସଭା କ୍ଷେତ୍ରରେ ପଟ୍ଟନାୟକ ପରିବାର ବିରାଟ ବ୍ୟବସାୟିକ ସାମ୍ରାଜ୍ୟ ରହିଛି। ଆର୍ଥିକ ଭାବେ ସ୍ୱଚ୍ଛଳ ହୋଇଥିବାରୁ ତାଙ୍କର ଏକାନ୍ତ ଅନୁଗତ ମଧ୍ୟ ରହିଛନ୍ତି। ତେଣୁ ଭୁବନେଶ୍ୱର ଲୋକସଭା କ୍ଷେତ୍ରରେ ନିରଞ୍ଜନଙ୍କ ପ୍ରାର୍ଥିତ୍ୱ ଉଭୟ ଅପରାଜିତା ଷଡ଼ଙ୍ଗୀ ଏବଂ ଶ୍ରୀମୟୀ ମିଶ୍ରଙ୍କ ମୁଣ୍ଡବିନ୍ଧାର କାରଣ ହେବ ବୋଲି ସମୀକ୍ଷକମାନେ କହିଛନ୍ତି।

ଅପରପକ୍ଷରେ କଂଗ୍ରେସ ରାଜନୀତିକୁ ଅନୁଶୀଳନ କରିଥିବା ଜଟଣୀ ଯୁବକ ଅନନ୍ତ ଗୁରୁ ଚୌଧୁରୀ କୁହନ୍ତି ଯେ, ଏଆଇସିସି ଟିମ୍ ସର୍ଭେ କରିଦେଲେ ନିରଞ୍ଜନ ପଟ୍ଟନାୟକ ପ୍ରାର୍ଥୀ ହୋଇ ଯିବେ ନାହିଁ। ସୁନୀଲ କାନୁଗୋଲୁ ହୁଅନ୍ତୁ କି ରାହୁଲ ଗାନ୍ଧୀ କାହାରିକୁ ପଟ୍ଟନାୟକ ପରିବାର ଖାତିର କରନ୍ତିନି। ସେମାନେ କୋଟି କୋଟି ଟଙ୍କା ଚାନ୍ଦା ଦିଅନ୍ତି। କଂଗ୍ରେସ ହାଇକମାଣ୍ଡଙ୍କ ଜୁ ନାହିଁ, ନିରଞ୍ଜନ ବାବୁଙ୍କୁ ଭୁବନେଶ୍ୱରୁ ଲଢିବାକୁ କହିଦେବେ। ଗତଥର ନିରଞ୍ଜନ ବାବୁଙ୍କୁ ଇଡି ନୋଟିସ୍ ପରେ ସେ ସିଧା ବିଜେପି ନେତୃତ୍ୱର ହାତବାରିସି ହୋଇ ଯାଇଥିଲେ। ସେମାନଙ୍କ କହିବାନୁଯାୟୀ, ଭୁବନେଶ୍ୱରରେ ଦୁର୍ବଳ ପ୍ରାର୍ଥୀ ଦେବା। ସୁର ରାଉତରାୟଙ୍କ ମାର୍ଫତରେ ଅପରାଜିତାଙ୍କ ପାଇଁ ଭୋଟ କରାଇବା ସବୁ ନିରଞ୍ଜନ ହିଁ କରିଥିଲେ। ଫଳ ସ୍ୱରୂପ ବିଜେପି ଖଣ୍ଡପଡ଼ାରେ ହାଲୁକା ଲଢେଇ ଲଢିଥିଲା। ଯାହା ଦ୍ୱାରା ସୌମ୍ୟ ଏକ ବୃହତ ବ୍ୟବଧାନରେ ଜିତି ବିଜେଡି  ବିଭାଜନ ଆଡ଼କୁ ବାଟ କଢାଇବେ। ତେଣୁ ନିରଞ୍ଜନ ବାବୁ ଭୁବନେଶ୍ୱର ନ ଲଢି ବାଲେଶ୍ୱର-କନ୍ଧମାଳ ଲୋକସଭା କିମ୍ବା ଭଣ୍ଡାରୀପୋଖରୀ ବିଧାନସଭା ଲଢିପାରନ୍ତି ବୋଲି ଶ୍ରୀ ଗୁରୁ ଚୌଧୁରୀ କହିଛନ୍ତି।