ଉତ୍ତର ଓଡ଼ିଶାର ବିଭିନ୍ନ ଆସନର ପ୍ରାର୍ଥୀ ଚିନ୍ତା ବିଜେଡିକୁ ଘାରୁଛି, ବିଦ୍ରୋହ ଦମନ ନେତୃତ୍ୱ ପାଇଁ ଆହ୍ୱାନ

ଭୁବନେଶ୍ୱର : ଫେବୃୟାରୀ ଶେଷ ସପ୍ତାହରେ ସାଧାରଣ ନିର୍ବାଚନ ପାଇଁ ତାରିଖ ଓ ବିଜ୍ଞପ୍ତି ଘୋଷଣା ହେବାର ଯଥେଷ୍ଟ ସମ୍ଭାବନା ରହିଛି। ଏହାକୁ ଦୃଷ୍ଟିରେ ରଖି ଶାସକ ଦଳ ବିଜେଡି ବ୍ୟାପକ ପ୍ରସ୍ତୁତି ଜାରି ରଖିଛି। ଏହି କ୍ରମରେ ଉତ୍ତର ଓଡ଼ିଶା ପାଇଁ ଦଳ ସ୍ୱତନ୍ତ୍ର ଯୋଜନା କରୁଛି। ମୟୂରଭଞ୍ଜ, କେନ୍ଦୁଝର ଏବଂ ଅବିଭକ୍ତ ବାଲେଶ୍ୱର ଜିଲ୍ଲାକୁ ଉତ୍ତର ଜୋନ୍ ଭାବେ ବିଜେଡି ଚିହ୍ନିତ କରିଛି। ଏହି ଜୋନ୍ ମଧ୍ୟରେ ଆସୁଥିବା ମୟୂରଭଞ୍ଜ ଲୋକସଭା ଆସନ ଜିତିବା ଦଳ ପାଇଁ ସମ୍ମାନର ପ୍ରଶ୍ନ ହୋଇଛି। ଏହି ଜିଲ୍ଲାରୁ ମହାମହିମ ରାଷ୍ଟ୍ରପତି ମହୋଦୟା ଦ୍ରୌପଦୀ ମୁର୍ମୁ ପ୍ରତିନିଧିତ୍ୱ କରୁଛନ୍ତି। ସାଂସଦ ତଥା କେନ୍ଦ୍ର ମନ୍ତ୍ରୀ ବିଶେଶ୍ୱର ଟୁଡୁ ପୁନର୍ବାର ପ୍ରାର୍ଥୀ ହେବାର ସମ୍ଭାବନା ରହିଛି। ସେ ବିଧାନସଭା ଲଢିବାକୁ ଆଗ୍ରହ ଥିବା ଖବର ଚର୍ଚ୍ଚା ହେଉଥିଲା। ଏହା ହେଲେ ମୟୂରଭଞ୍ଜ ଆସନରେ ଗିରୀଶ ଚନ୍ଦ୍ର ମୁର୍ମୁ ଏବଂ ଦ୍ରୌପଦୀ ମୁର୍ମୁଙ୍କ କନ୍ୟା ଇତିଶ୍ରୀଙ୍କୁ ପ୍ରାର୍ଥୀ କରିବା ନେଇ ଚର୍ଚ୍ଚା ଜୋର ଧରିଛି। ଏହି ପରିସ୍ଥିତିରେ ବିଜେଡି ପୂର୍ବ ପ୍ରାର୍ଥୀଙ୍କୁ ବଜାୟ ରଖିବ, ନା ପରିବର୍ତ୍ତନ କରିବ, ସେ ଦ୍ୱନ୍ଦ୍ୱରେ ରହିଛି।

ଅନୁରୂପ ଭାବେ ଯଶୀପୁର ଏବଂ ସାରସକଣାରେ ତ୍ରିକୋଣୀୟ ମୁକାବିଲା ହେବାକୁ ଯାଉଛି। ଏହି ଦୁଇ ଆସନ ପାଇଁ ବିଜେଡି ପ୍ରାର୍ଥୀ ପରିବର୍ତ୍ତନ କରିବାକୁ ବିଚାରବିମର୍ଶ କରୁଛି। ବାଙ୍ଗିରୀପୋଷୀରେ ପୂର୍ବ ପ୍ରାର୍ଥୀ ସୁଦାମ ମାରାଣ୍ଡିଙ୍କୁ ପୁନର୍ବାର ଟିକେଟ ମିଳିପାରେ। ଉଦଳାରେ ଦଳୀୟ ଭୋଟ ବୃଦ୍ଧି ପାଇଥିବାରୁ ଆସନଟି ଜିତିହେବ ବୋଲି ବିଜେଡି ମନେ କରୁଛି। ବାରିପଦାରେ ଦଳୀୟ ସ୍ଥିତି ଖରାପ ରହିଛି। ଏହି ଆସନରେ ବିଜେଡିର ସ୍ଥିତି ଖରାପ ରହିଥିବା ଜଣାପଡିଛି। ମୋରଡ଼ାରେ ଆଗାମୀ ଦିନରେ ତ୍ରିକୋଣୀୟ ମୁକାବିଲା ହେବାର ସମ୍ଭାବନା ରହିଛି। ଗତଥର ଅପେକ୍ଷା କଂଗ୍ରେସ ଏବଂ ଜେଏମଏମ୍ ନେତୃତ୍ୱାଧିନ ଇଣ୍ଡିଆ ଗଠବନ୍ଧନ ଅଧିକ ସାମର୍ଥ୍ୟରେ ଲଢିବ, ତେଣୁ ରାଜନୈତିକ ସ୍ଥିତି ସାମାନ୍ୟ ପରିବର୍ତ୍ତନ ହେବାର ସମ୍ଭାବନା ରହିଛି। କେନ୍ଦୁଝର ଲୋକସଭାରେ ବିଜେଡି ଭୋଟ ହ୍ରାସ ପାଇବାର ଆଶଙ୍କା କରାଯାଉଛି। ଏଠି ବିଜେପିର ଲୋକସଭା ଭୋଟ ବୃଦ୍ଧି ପାଉଥିବା ଗୁଇନ୍ଦା ରିପୋର୍ଟରୁ ଜଣାପଡିଛି। କରଞ୍ଜିଆ,ଚମ୍ପୁଆ, ତେଲକୋଇ, ଘସିପୁରା, ଆନନ୍ଦପୁରରେ ବିଜେଡି ସ୍ଥିତି ଭଲ ରହିଛି। କେନ୍ଦୁଝର ଓ ପାଟଣାରେ ନିର୍ବାଟନୀ ପରିସ୍ଥିତି ନୂଆ ରାଜନୈତିକ ସମୀକରଣକୁ ଜନ୍ମ ଦେବାର ସମ୍ଭାବନା ରହିଛି। ଏହି ଲୋକସଭା ଆସନ ପ୍ରାର୍ଥିନୀକୁ ପୁନର୍ବାର ଟିକେଟ୍ ଦିଆଯିବ କି ନାହିଁ, ସେ ନେଇ ବିଜେଡି ନେତୃତ୍ୱର ଦ୍ୱନ୍ଦ୍ୱ ରହିଛି। ବାଲେଶ୍ୱର ଜିଲ୍ଲାରେ ବିଜେଡିକୁ ସର୍ବାଧିକ ପ୍ରାର୍ଥୀ ଚିନ୍ତା ରହିଛି। ଭୋଗରାଇ, ବାଲେଶ୍ୱର ସଦର ଏବଂ ବସ୍ତାରେ ପ୍ରାର୍ଥୀତ୍ୱ ନେଇ ସର୍ବାଧିକ ଦ୍ୱନ୍ଦ୍ୱ ରହିଛି। ଏହି ଲୋକସଭା ରବୀନ୍ଦ୍ର କୁମାର ଜେନା ପୁନର୍ବାର ପ୍ରାର୍ଥୀ ହେବା ନେଇ ଏତେଟା ଆଗ୍ରହୀ ନାହାନ୍ତି। ରେମୁଣା ଓ ନୀଳଗିରି ପ୍ରାର୍ଥୀଙ୍କୁ ବଦଳାଇବାକୁ ବିଜେଡି ଚାହୁଁଛି, ହେଲେ କିଏ ପ୍ରାର୍ଥୀ ହେଲେ ବିଦ୍ରୌହ କମ୍ ହେବ, ସେହି ଚିନ୍ତା ନେତୃତ୍ୱକୁ ଘାରିଛି। କିଛି ବରିଷ୍ଠ ନେତାଙ୍କ କଂଗ୍ରେସ କିମ୍ବା ଇଣ୍ଡିଆ ଗଠବନ୍ଧନକୁ ପ୍ରତ୍ୟାବର୍ତ୍ତନ ବାଲେଶ୍ୱର ଜିଲ୍ଲା ଓ ଲୋକସଭାର ସମୀକରଣକୁ ବିଗାଡି ଦେବାର ଆଶଙ୍କା କରାଯାଉଛି। ଶେଷର ଭଦ୍ରକ ଜିଲ୍ଲାରେ କେବଳ ଧାମନଗର ପ୍ରାର୍ଥୀ ବଦଳିବେ ବୋଲି ଏକ ସୂଚନା ମିଳୁଛି। ଅନ୍ୟ ସବୁ ପ୍ରାର୍ଥୀଙ୍କୁ ପୁନର୍ବାର ଟିକେଟ୍ ମିଳିବାର ସମ୍ଭାବନା ରହିଛି। ଆଶାୟୀ ଅସିତ ପଟ୍ଟନାୟକଙ୍କୁ କେମିତି ରାଜନୈତିକ ଥଇଥାନ କରାଯିବ, ତାହା ହିଁ ଆଗାମୀ ଦିନରେ ଆଲୋଚନାର ବିଷୟ ହେବାକୁ ଯାଉଛି। ରାଜୁ ଦାସ ବିଜେଡିକୁ ଫେରିବେ ନା ଫେରିବେ ନାହିଁ, ତାହା ଉପରେ ମଧ୍ୟ ସମସ୍ତଙ୍କ ନଜର ରହିଛି। ଏହି ଲୋକସଭା ଆସନରେ ବିଜେଡିର ସ୍ଥିତି ବିଜେଡି ଅପେକ୍ଷା ଭଲ ରହିଥିବା ବିଜେଡିର ସର୍ଭେ ଟିମ୍ ରିପୋର୍ଟ ଦେଇଛି।