ବିଧାୟକ ହେବାକୁ ଅଧିକ ଇଚ୍ଛା ପ୍ରକାଶ କରୁଛନ୍ତି ଓଡ଼ିଆ ନେତା…ସାଂସଦ ପଦକୁ ନେଇ ଟେକୁଛନ୍ତି…
ଭୁବନେଶ୍ୱର : ଦିନ ଥିଲା ଦିଲ୍ଲୀ ଦରବାରରେ ଓଡ଼ିଶାର ସ୍ୱର ହେବା ପାଇଁ ନେତାମାନଙ୍କ ମଧ୍ୟରେ ପ୍ରତିଯୋଗିତା ଲାଗୁଥିଲା। କେନ୍ଦ୍ର ସରକାରଙ୍କ ମନ୍ତ୍ରିମଣ୍ଡଳ ତଥା ସଂସଦରେ ନିଜର ପରାକାଷ୍ଠା ଦେଖାଇବା ପାଇଁ ରାଜନେତା ଖୁସି ଅନୁଭବ କରୁଥିଲେ। ଦିଲ୍ଲୀରେ ଓଡ଼ିଶାର କଥା ରଖିବାର ଦକ୍ଷତା ଓ ସେଠାରୁ ଲଢି ରାଜ୍ୟର ସାମ୍ବିଧାନିକ ଭାଗ ଆଣିବା ପ୍ରାଥମିକତା ଥିଲା। ହରେକୃଷ୍ଣ ମହତାବ, ବିଜୁ ପଟ୍ଟନାୟକ, ନୀଳମଣି ରାଉତରାୟ, ରବି ରାୟ, ସମରେନ୍ଦ୍ର କୁଣ୍ଡୁ, ସୁରେନ୍ଦ୍ର ମହାନ୍ତି, ଶ୍ରୀକାନ୍ତ ଜେନା ପ୍ରମୁଖ ଦିଲ୍ଲୀ ଦରବାରରେ ଓଡ଼ିଶାର ସ୍ୱର ଥିଲେ। ମାତ୍ର ଜନତା ଦଳ ବିଭାଜନ ପରେ ଦିଲ୍ଲୀ ରାଜନୀତିରେ ଓଡ଼ିଶାର ଗୁରୁତ୍ୱ ହ୍ରାସ ପାଇବାରେ ଲାଗିଛି। ସଂସଦରେ ଓଡ଼ିଶାର ସ୍ୱର କ୍ୱଚିତ ଦେଖିବାକୁ ମିଳୁଛି। ବିଶେଷ କରି ଶାସକ ଦଳ ବିଜେଡିରେ ସାଂସଦ ପ୍ରାର୍ଥୀ ହେବା ଅପେକ୍ଷା ବିଧାୟକ ପ୍ରାର୍ଥୀ ହେବାକୁ ନେତାଏ ଅଧିକ ଗୁରୁତ୍ୱ ଦେଉଛନ୍ତି। ରାଜ୍ୟ ବିଜେପି ଓ କଂଗ୍ରେସରେ ମଧ୍ୟ ଏହି ଟ୍ରେଣ୍ଡ ରହିଛି।
ଗତଥର ନବରଙ୍ଗପୁରରୁ ପ୍ରାର୍ଥୀ ହୋଇଥିବା ରମେଶ ମାଝୀ ଝରି ଗାଁରୁ ବିଧାୟକ ହେବା ପାଇଁ ଆଗ୍ରହ ପ୍ରକାଶ କରିଛନ୍ତି। ଜଗତସିଂହପୁର ସାଂସଦ ରାଜଶ୍ରୀ ମଲ୍ଲିକ ତିର୍ତ୍ତୋଲ, ଯାଜପୁର ସାଂସଦ ଶର୍ମିଷ୍ଠା ସେଠୀ ବିଞ୍ଝାରପୁରରୁ ପ୍ରାର୍ଥୀ ହେବାର ସମ୍ଭାବନା ସୃଷ୍ଟି ହୋଇଛି। ବରୀ ଆସନ ପାଇଁ ସୁଲତା ଦେଓ, କେନ୍ଦୁଝର ସଦର ପାଇଁ ଚନ୍ଦ୍ରାଣୀ ମୁର୍ମୁ, ଧାମନଗରରୁ ମଞ୍ଜୁଲତା ମଣ୍ଡଳଙ୍କ ପ୍ରାର୍ଥୀତ୍ୱ ନେଇ ବିଜେଡିର ସର୍ଭେକ୍ଷଣ ଟିମ୍ ବିଚାରବିମର୍ଶ ଜାରି ରଖିଛି। ମହିଳା ସଂରକ୍ଷଣ ଚର୍ଚ୍ଚାର କେନ୍ଦ୍ର ବିନ୍ଦୁ ହୋଇଥିବାରୁ ବିଜେଡି ପ୍ରତି ଲୋକସଭା ଅଧିନରେ ଅନୁନ୍ୟ ଦୁଇଟି ମହିଳା ବିଧାୟକ ପ୍ରାର୍ଥୀ ଦେବାକୁ ଯୋଜନା କରୁଛି। ମାତ୍ର ୨୫ ବର୍ଷର ସରକାରୀ ବିରୋଧୀ ହାଓ୍ୱା ଓ ମାଳମାଳ ଆଶାୟୀ ବିଜେଡିର ମଣ୍ଡବିନ୍ଧାର କାରଣ ହୋଇଛି। କଳାହାଣ୍ଡି ଲୋକସଭାରୁ ଗତଥର ପ୍ରାର୍ଥୀ ହୋଇଥିବା ପୁଷ୍ପେନ୍ଦ୍ର ମଧ୍ୟ ବିଧାନସଭା ଲଢିବାକୁ ଚାହୁଁଛନ୍ତି। କଂଗ୍ରେସ ନେତା ନରସିଂହ ମିଶ୍ରଙ୍କ ପୁଅ ସମରେନ୍ଦ୍ର ବିଜେଡି ନ ଆସିଲେ, ଗତଥର ଲୋକସଭା ପ୍ରାର୍ଥୀ କଳିକେଶଙ୍କୁ ବିଧାନସଭା ଲଢିବାକୁ ବିଜେଡି କହିପାରେ ବୋଲି ଆଲୋଚନା ହେଉଛି। ଅନୁରୂପ ଭାବେ ବରଗଡ଼ରୁ ଲଢିଥିବା ପ୍ରସନ୍ନ ଆଚାର୍ଯ୍ୟ ଏବଂ ସମ୍ବଲପୁରରୁ ଲଢିଥିବା ନଳିନୀକାନ୍ତ ପ୍ରଧାନ ଯଥାକ୍ରମେ ରେଢାଖୋଲ ଓ ଆଠମଲ୍ଲିକର ପ୍ରାର୍ଥୀ ହୋଇପାରନ୍ତି।
ଏହି ଟ୍ରେଣ୍ଡ କେବଳ ବିଜେଡିରେ ନାହିଁ। ବିଜେପିରେ ମଧ୍ୟ ରହିଛି। ରାଜ୍ୟ ରାଜନୀତିରେ ବଡ଼ ଆକାକ୍ଷାଂ ରଖୁଥିବା ପ୍ରତାପ ଷଡଙ୍ଗୀ, ଅପରାଜିତା ଷଡଙ୍ଗୀ, ବିଶେଶ୍ୱର ଟୁଡୁ, ବସନ୍ତ ପଣ୍ଡା, ସୁରେଶ ପୂଜାରୀ ଏବଂ ନୀତେଶ ଗଙ୍ଗଦେବ ବିଧାନସଭା ଲଢିବାର ସୁଯୋଗ ମିଳିଲେ ହାତ ଛଡା କରିବେ ନାହିଁ ବୋଲି ଦଳୀୟ ମହଲରେ ଚର୍ଚ୍ଚା। କଂଗ୍ରେସରେ ମଧ୍ୟ ଏହି ଲକ୍ଷଣ ଦେଖାଯିବାର ସମ୍ଭାବନା ରହିଛି। ବାଲେଶ୍ୱରରୁ ପ୍ରାର୍ଥୀ ହୋଇଥିବା ନବଜ୍ୟୋତି ପଟ୍ଟନାୟକ ଭଣ୍ଡାରୀପୋଖରୀ କିମ୍ବା ବାଲେଶ୍ୱର ସଦର ଏବଂ କଳାହାଣ୍ଡିରୁ ଗତଥର ସାଂସଦ ପ୍ରାର୍ଥୀ ହୋଇଥିବା ଭକ୍ତ ଚରଣ ଦାସ ନର୍ଲା, ସମ୍ବଲପୁରରୁ ପ୍ରାର୍ଥୀ ହୋଇଥିବା ଶରତ ପଟ୍ଟନାୟକ ନୂଆପଡ଼ା, ବଲାଙ୍ଗୀରରୁ ପ୍ରାର୍ଥୀ ହୋଇଥିବା ସମରେନ୍ଦ୍ର ମିଶ୍ର ସ୍ଥାନୀୟ ବିଧାନସଭାରୁ ପ୍ରାର୍ଥୀ ହୋଇପାରନ୍ତି।
ଗ୍ରୀଷ୍ମ ଆସିବା ପୂର୍ବରୁ ଆସନ ନେତାଙ୍କ ଆସନ ବଦଳ ଆଲୋଚନା ସରଗରମ ହୋଇଛି। ମାର୍ଚ୍ଚ ମଧ୍ୟଭାଗରେ ଏନେଇ ସ୍ପଷ୍ଟ ସୂଚନା ମିଳିବ ବୋଲି ଜଣାପଡ଼ିଛି।
