ବୁମ୍ ବାୟା ନ ହେବାକୁ କଂଗ୍ରେସ ବରିଷ୍ଠ ନେତାମାନଙ୍କୁ ମିଳିଲା ପରାମର୍ଶ

ଭୁବନେଶ୍ୱର :  ରାଜଧାନୀ ଭୁବନେଶ୍ୱର ଠାରୁ ଆରମ୍ଭ କରି ଏହାର ଉପକଣ୍ଠ ଅଞ୍ଚଳରେ ଗଢି ଉଠିଛି ଅନେକ କେନ୍ଦ୍ରୀୟ ସଂସ୍ଥା। ପ୍ରାୟ ସବୁ କଂଗ୍ରେସ କିମ୍ବା ଅଣ ବିଜେପି ସରକାରଙ୍କ ସମୟରେ ଏହାର ଅନୁମୋଦନ କରାଯାଇଥିଲା। ବିଜେପି ସମୟରେ ଘୋଷଣା କରାଯାଇଥିବା ସଂସ୍ଥା ୟୁପିଏ ସମୟରେ ବିକଶିତ କରାଯାଇଛି। ହେଲେ କଂଗ୍ରେସ ଏହି ସବୁ ଉପଲବ୍ଧିକୁ ଗଣମାଧ୍ୟମ କିମ୍ବା ଭୋଟରଙ୍କ ସମ୍ମୁଖକୁ ଆଣିବା ଦୂରର କଥା। ନିଜେ ଜାଣି ସଚେତନ ହୋଇପାରୁନାହାନ୍ତି। ବରଂ ମୂଳ ପ୍ରକଳ୍ପରେ ଇଟା ଯୋଡୁଥିବା ବିଜେପି ନେତାଙ୍କୁ ପ୍ରଶଂସା କରୁଛନ୍ତି। ଏହାର ପ୍ରକୃଷ୍ଟ ଉଦାହରଣ ହେଉଛନ୍ତି- ସୁର ରାଉତରାୟ। କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ସାଂସଦ ଅପରାଜିତା ଷଡଙ୍ଗୀଙ୍କୁ ଉପରେ ପଡି ପ୍ରଶଂସା କରୁଛନ୍ତି। ଏହା ବ୍ୟକ୍ତିଗତ ଭାବେ ସୁରଙ୍କୁ ବ୍ୟବସାୟିକ ଓ ଆର୍ଥିକ ଫାଇଦା ଦେଇ ଆସୁଛି। ତାଙ୍କ ସାନ ପୁଅ ମନ୍ମଥ ମଧ୍ୟ ବିଜେପି ନେତୃତ୍ୱଙ୍କ ନଜରକୁ ଆସିଗଲେଣି। ହେଲେ କଂଗ୍ରେସ ଦୀର୍ଘକାଳୀନ କ୍ଷତି ସହୁଛି। ତେଣୁ ସୁରଙ୍କ ବୟାନବାଜି କଂଗ୍ରେସ ପାଇଁ ଘାତକ ହେଉଛି। ବିଜେପି ଆଇଟି ସେଲ୍ ସୁରଙ୍କୁ ନିଜର ମାଷ୍ଟ୍ରରଷ୍ଟୋକ୍ ଭାବେ ଅଭିହିତ କରୁଛି। ତେଣୁ ତାଙ୍କ ଉପରେ ରୋକ୍ ଲାଗିବା ଦରକାର ବୋଲି ଏଆଇସିସି ଅନୁଭବ କରିଛି। ଅନୁରୂପ ଭାବେ ପିସିସି ସଭାପତି ବି କମ୍ ନୁହଁନ୍ତି, ସୌମ୍ୟ ରଞ୍ଜନ ପଟ୍ଟନାୟକ ବିଜେଡି ଦଳର ସଦସ୍ୟ ଥିବା ବେଳେ ତାଙ୍କ ପାଇଁ ଓକିଲାତି କରିଥିଲେ। ୨୦୧୪ରେ କଂଗ୍ରେସକୁ ସାରା ରାଜ୍ୟରେ ହରାଇବା ପାଇଁ ସବୁ ପ୍ରକାର ଚେଷ୍ଟା କରିଥିଲେ। ସୌମ୍ୟଙ୍କ ପ୍ରତି ଶରତଙ୍କ ପ୍ରେମ ମଧ୍ୟ ଏଆଇସିସିରୁ ଖଟକା ଲାଗିଥିଲା। ତେଣୁ ଆଗାମୀ ଦିନରେ ପିସିସି ସଭାପତି ସତର୍କ ହୋଇଯିବା ଉଚିତ ବୋଲି ଏଆଇସିସି ତାଗିଦ୍ କରିସାରିଛି। ଅନୁରୂପ ଭାବେ ଆର୍ଯ୍ୟ କୁମାର ଜ୍ଞାନେନ୍ଦ୍ର ମଧ୍ୟ ଦଳ ଅପେକ୍ଷା ଗୋଟିଏ ନିର୍ଦ୍ଦିଷ୍ଟ ପରିବାରର ସ୍ୱାର୍ଥକୁ ବିଶେଷ ଧ୍ୟାନ ଦେଉଛନ୍ତି। ତେଣୁ ଏହି ସବୁ ନେତାଙ୍କ ଉପରେ ରୋକ୍ ଲାଗିବା ଦରକାର ବୋଲି ସୁନୀଲ କୋନୁଗୋଲୁଙ୍କ ଟିମ୍ ରାହୁଲ ଗାନ୍ଧୀଙ୍କ ଟିମ୍ କୁ ପରାମର୍ଶ ଦେଇଛି। କେତେକ ଛାମୁଆ ସଙ୍ଗଠନର ନେତା ମଧ୍ୟ ଦଳ କିମ୍ବା ଏଆଇସିସି ସହ ଆଲୋଚନା ନ କରି ଖବରଦାତା ସମ୍ମିଳନୀ କରୁଛନ୍ତି, ଯାହାକୁ ନେଇ ମଧ୍ୟ ଚିନ୍ତା ପ୍ରକଟ କରାଯାଇଛି। ଏହି ପରିପ୍ରେକ୍ଷୀରେ ଏଆଇସିସିର ନିର୍ଦ୍ଦେଶ କ୍ରମେ ଗତ 16 ତାରିଖରେ ଏକ ଚିଠି କରାଯାଇଛି। ଏହି ଚିଠି ବରିଷଅଠ ଉପସଭାପତି ଶିବାନନ୍ଦ ରାୟଙ୍କ ମାର୍ଫତରେ ହୋଇଛି।  ଏଥିରେ ପିସିସି ସହ ଆଲୋଚନା ନ କରି କୌଣସି ପ୍ରେସମିଟ୍ କିମ୍ବା ଗଣମାଧ୍ୟମରେ ବିବୃତି ଦେବାକୁ ସ୍ପଷ୍ଟ ବାରଣ କରାଯାଇଛି।