ପ୍ରଦେଶ କଂଗ୍ରେସର ପ୍ରସ୍ତୁତି ଆରମ୍ଭ ପୂର୍ବରୁ ସମ୍ଭାବନା ହ୍ରାସ ହୋଇ ଯାଇ ନ ଥିବ ତ……

ଭୁବନେଶ୍ୱର : ସାଧାରଣ ନିର୍ବାଚନ ପାଖେଇ ଆସିଲାଣି। ବିଜେଡିର ନିର୍ବାଚନ ପ୍ରସ୍ତୁତି ବିରୋଧି ବିଜେପି ଏବଂ କଂଗ୍ରେସ ଠାରୁ ଢେର ଅଧିକ ରହିଛି। କଂଗ୍ରେସର ପ୍ରସ୍ତୁତି ଅପେକ୍ଷାକୃତ କମ୍ ରହିଛି।  ଗତ ନିର୍ବାଚନ ପରେ କଂଗ୍ରେସର ଶୀର୍ଷ ନେତା ମଲ୍ଲିକାର୍ଜୁନ ଖଡ଼ଗେ, ସୋନିଆ ଗାନ୍ଧୀ, ରାହୁଲ ଗାନ୍ଧୀ ଓଡ଼ିଶା ଆସିନାହାନ୍ତି। ଇତି ମଧ୍ୟରେ ତିନି ଜଣ ପ୍ରଭାରୀ ଓଡ଼ିଶା କଂଗ୍ରେସ ଦେଖି ସାରିଲେଣି। ଏମାନେ ହେଉଛନ୍ତି- ଜିତେନ୍ଦ୍ର ସିଂ, ଚେଲ୍ଲା କୁମାର ଏବଂ ଅଜୟ କୁମାର। ଫେବୃୟାରୀ ମାସର ଯେ କୌଣସି ସମୟରେ ନିର୍ବାଚନ ଘୋଷଣା ହେବ ବୋଲି ବିଜେପି ସମର୍ଥକମାନେ କହି ବୁଲୁଛନ୍ତି। ଏହି କ୍ରମରେ ରାଜ୍ୟ କଂଗ୍ରେସର ପ୍ରସ୍ତୁତି ଉତ୍ସାହଜନକ ନୁହେଁ ବୋଲି ସାଧାରଣରେ ମତ ପ୍ରକାଶ ପାଇଛି।

ବିଜେଡି ଏବଂ ବିଜେପି ଜାତୀୟସ୍ତରରେ ଗୋଟିଏ ନିକିତିରେ ବସିଛନ୍ତି। ଗତ ସାଧାରଣ ନିର୍ବାଚନ ପରେ ବିଜେପି ସମର୍ଥିତ ଅଶ୍ୱିନୀ ବୈଷ୍ଣବଙ୍କୁ ଓଡ଼ିଶାରୁ ରାଜ୍ୟ ସଭା ପଠା ଯାଇଥିଲା। ତାଙ୍କ ପ୍ରାର୍ଥୀତ୍ୱକୁ ବିଜେଡ଼ି ସମର୍ଥନ କରିଥିଲା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଘୋଷଣା କରିଥିଲେ। ଅଶ୍ୱିନୀ ସର୍ବଭାରତୀୟ ସେବା ଚାକିରୀରୁ ଅବସର ନେବା ପରେ ଘରୋଇ କମ୍ପାନୀରେ କାମ କରିଥିଲେ। ଓଡ଼ିଶାର ରାଜନୀତିକୁ ପ୍ରଭାବିତ କରୁଥିବା ଖଣି ଲବିର ଶ୍ରୀ ବୈଷ୍ଣବ ପ୍ରଶାସନିକ ଚେହେରା ଥିଲେ। ତେଣୁ ତାଙ୍କ ପ୍ରାର୍ଥୀତ୍ୱ ବିଜେଡି-ବିଜେପି ମଧ୍ୟରେ ଏକ ସେତୁ ରୂପରେ କାର୍ଯ୍ୟ କରିଥିଲା।  ଏହା ପରେ ମଣିପୁର ହିଂସା ଭଳି ଅତ୍ୟନ୍ତ ସମ୍ବେଦନଶୀଳ ପ୍ରସଙ୍ଗରେ ହୋଇଥିବା ଅବିଶ୍ୱାସ ପ୍ରସ୍ତାବରେ ବିଜେଡି ଏନଡିଏକୁ ସମର୍ଥନ କରିଥିଲା। ସେହି ପ୍ରସଙ୍ଗରେ ନିଜକୁ ବିରତ ରଖି ନବୀନ ପଟ୍ଟନାୟକ ଏବଂ ଭି.କେ ପାଣ୍ଡିଆନ୍ ପିନାକୀ ମିଶ୍ରଙ୍କ ଦ୍ୱାରା ପ୍ରଧାନମନ୍ତ୍ରୀଙ୍କ ପ୍ରଶଂସା କଲେ। ସର୍ବଭାରତୀୟସ୍ତରରେ ଜାତି ଭିତ୍ତିକ ଜନଗଣନା ଦାବି ଜୋର ଧରିଛି। ମାତ୍ର ବିଜେପି ଏହି ଦାବିକୁ ଗ୍ରହଣ କରୁନାହିଁ। ଜାତିଭିତ୍ତିକ ଜନଗଣନା ସହ ସାଧାରଣ ଭାବେ ପ୍ରତି ଦଶନ୍ଧିରେ ହେଉଥିବା ଜନଗଣନା ମଧ୍ୟ ହେଉନାହିଁ। ୟୁପିଏ ସମୟରେ ରାଜ୍ୟ ଗୁଡିକ ମିଳୁଥିବା ଅନୁଦାନ ହାର ଯଥେଷ୍ଟ ହ୍ରାସ ପାଇବାରେ ଲାଗିଛି। ଏହି ସବୁ ସମ୍ବେଦନଶୀଳ ପ୍ରସଙ୍ଗ ଥିବା ସତ୍ତ୍ୱେ କଂଗ୍ରେସ ଏହାକୁ ଆୟୁଧ କରି କୌଣସି ରାଜନୈତିକ କାର୍ଯ୍ୟ କରିଲା ନାହିଁ। କଂଗ୍ରେସର ଜଣେ ପୂର୍ବତନ ବିଧାୟକଙ୍କ କହିବାନୁଯାୟୀ , କଂଗ୍ରେସରେ ସାମାଜିକ ନ୍ୟାୟ ପ୍ରସଙ୍ଗକୁ କୋଣ ଠେସା କରିବା ପାଇଁ ତୁଳସୀ ଯାତ୍ରା, ବିଜୁଳି କର ଏବଂ ତଥାକଥିତ ଦରଦାମ ବୃଦ୍ଧି ଦାବି କରାଯାଉଛି। ଶାଗମାଛ ଦରରେ ଖଣିଜ ସମ୍ପଦ ନିଲାମ କରାଯାଉଛି। ଏହି ପ୍ରସଙ୍ଗରେ ଦଳର ନେତୃତ୍ୱ ସମ୍ପୂର୍ଣ୍ଣ ନୀରବ ରହିଛି। ବିଜେଡ଼ି ପାଇଁ ରାଜନୈତିକ ପରାମର୍ଶଦାତା ଭାବେ କାମ କରୁଥିବା ଗୋଟିଏ ଦକ୍ଷିଣ ଭାରତୀୟ କମ୍ପାନୀ ଏକ ମତ ଦେଇଥିଲା। ଯାହା କଂଗ୍ରେସ ପାଇଁ ଏକ ସୁଯୋଗ ରହିଥିବା ଉଲ୍ଲେଖ କରିଥିଲା। ପ୍ରାୟ ଚାରି ମାସ ପୂର୍ବେ ଏହି ସର୍ଭେକ୍ଷଣ ଦ୍ୱାରା କୁହାଯାଇଥିଲା ଯେ, କଂଗ୍ରେସ ଏକାକୀ ସରକାର କରିପାରିବ ନାହିଁ। କିମ୍ବା ମୁଖ୍ୟ ବିରୋଧି ଦଲ ହୋଇ ପାରିବ ନାହିଁ। ମାତ୍ର ଯଦି ବିଜେଡି-ବିଜେପି ସମ୍ପର୍କ, ଖଣି ଏବଂ ସାମାଜିକ ନ୍ୟାୟ ପ୍ରସଙ୍ଗରେ ଆଗକୁ ବଢେ, ତେବେ ୨୩ରୁ ୨୭ ବିଧାନସଭା ଆସନ ଜିତିପାରିବ। ଅନୁରୂପ ଭାବେ ଲୋକସଭାରେ କୋରାପୁଟ, ବାଲେଶ୍ୱର, ନବରଙ୍ଗପୁର, ବ୍ରହ୍ମପୁରରେ ମୁଖ୍ୟ ଲଢେଇକୁ ଆସିପାରିବ। କଳାହାଣ୍ଡି, ସୁନ୍ଦରଗଡ଼, ବଲାଙ୍ଗୀର , ପୁରୀ ଏବଂ ଭୁବନେଶ୍ୱରରେ ବିଜେପିର ଭୋଟ ହାର ହ୍ରାସ କରିପାରିବ। ମାତ୍ର ଏହି ଅନୁଯାୟୀ ଦଳର କୌଣସି କାର୍ଯ୍ୟକ୍ରମ ହୋଇନାହିଁ।

ପ୍ରଭାରୀ ବଦଳାଇବା ପରେ ଉତ୍ସୁକତା ରହିଛି। ମାତ୍ର ଦଳର ଦୀର୍ଘକାଳୀନ ସ୍ୱାର୍ଥ ଅପେକ୍ଷା କିଛି ଗୋଷ୍ଠୀଙ୍କ ସର୍ବକାଳୀନ ସ୍ୱାର୍ଥକୁ ପ୍ରାଧାନ୍ୟ ଦିଆଯାଉଥିବା କୁହାଯାଉଛି। କଂଗ୍ରେସର ଜଣେ ସମ୍ପାଦକ କୁହନ୍ତି ଯେ, ଏଆଇସିସି ନ କହିଲେ ଓବିସି ପ୍ରସଙ୍ଗରେ କାହାର ପାର୍ଟି ଖୋଲେନା। ଖଣି ପ୍ରସଙ୍ଗରେ କହିଲେ କିଛି ଗୋଷ୍ଠୀଙ୍କ ସମର୍ଥକ ଆପଣଙ୍କୁ ବିରୋଧ କରନ୍ତି, ତେଣୁ କଂଗ୍ରେସ ଠିକ୍ ସମୟରେ ସକ୍ରିୟ ନ ହେବା ରାଜ୍ୟରେ ଦ୍ୱି-ସ୍ତରୀୟ ଲଢେଇର ମୂଳଦୁଆ ପକାଉଛି ବୋଲି କଂଗ୍ରେସ ନେତା ଜଣଙ୍କ କହିଛନ୍ତି। ଇଣ୍ଡିଆ ମେଣ୍ଟ ବୈଠକ ଦୁଇଥର ହେବା ପରେ ବନ୍ଦ ରହିଛି। ଆଗାମୀ ବୈଠକରେ କିଛି ସମାଜବାଦୀ ଚିନ୍ତାଧାରର ଦଳ  ଯୋଗ ଦେବେନାହିଁ ବୋଲି ଜଣାପଡିଛି। ଆସନ ବୁଝାମଣା ହୋଇନାହିଁ। କଂଗ୍ରେସ ଅନ୍ୟ ଦଳ କଥା ନ ବିଚାରି କେତେକ ଲୋକ ପ୍ରାର୍ଥୀ ତାଲିକା ନେଇ ଦିଲ୍ଲୀ ଦୌଡୁ ଛନ୍ତି। ରାଜ୍ୟସ୍ତରୀୟ ଦାୟିତ୍ୱ ମିଳିଥିଲେ ମଧ୍ୟ ବ୍ୟକ୍ତିଗତ ଭାବେ କୌଣସି ଆସନରୁ ଜିତି ଏମପି, ଏମଏଲଏ ହେବାକୁ ଚାହୁଁଛନ୍ତି। ନିର୍ବାଚନ ଦୁଆରମୁହଁରେ ଥିଲେ ବି କେତେକ ନେତୃତ୍ୱ ଓ ବିଭିନ୍ନ ମୁଖ୍ୟ ପଦ ନୂଆ ନିଯୁକ୍ତିକୁ ଅନେଇ ବସୁଛନ୍ତି।

ନିର୍ବାଚନରେ କେଉଁ ବାର୍ତ୍ତାରେ ଲଢାଯିବ, ତାହାକୁ କଂଗ୍ରେସ ଓ ଇଣ୍ଡିଆ ପ୍ରାଧାନ୍ୟ ଦେଉନାହିଁ। ବରଂ ଖାଲି ଇଏ ଆସିବ। କେନ୍ଦ୍ରରୁ ନେତା ଆଣି କାର୍ଯ୍ୟକ୍ରମ କରିବାକୁ ଚିନ୍ତା କରୁଛନ୍ତି। ଦକ୍ଷିଣ ଭାରତ କଂଗ୍ରେସ ସଫଳତା ପାଉଛି। ଏହା କେବଳ ସଙ୍ଗଠନ ନୁହେଁ, ସରକାରକୁ ମଧ୍ୟ ସହାୟତା କରୁଛି। ଏହା ପଛରେ ରହିଛି ସାମାଜିକ ସମୀକରଣ ଅନୁଯାୟୀ କାର୍ଯ୍ୟକ୍ରମ। ଯାହା ସିଧାରମେୟ, ଭଟ୍ଟି ବିକ୍ରମଙ୍କ ଭଳି ନେତାଙ୍କ ଯୋଗୁ ସମ୍ଭବ ହୋଇଛି। ତେଣୁ ରାଜନୈତିକ ସମୀକ୍ଷକ ଚିନ୍ମୟ ରାଜୁ କହିଛନ୍ତି ଯେ, କଂଗ୍ରେସ ବହୁତ ସମୟ ସୁଯୋଗ ହରାଇସାରିଲାଣି। ସେହି କ୍ଷତିକୁ କେତେ ହ୍ରାସ କରାଯାଇପାରିବ, ସେ ନେଇ ପ୍ରସ୍ତୁତ ହେବା ଦରକାର। ଥ୍ରୀ ଏମ୍ –ମେସେଜ୍, ମେସ୍ଞ୍ଜର, ମେଥଡ୍ ଫର୍ମୁଲାରେ ଆଗକୁ ବଢିବାକୁ ପଡିବ। କେଉଁ ବାର୍ତ୍ତା ନେଇ କିଏ କେଉଁ ଧାରାରେ ଯିବ, ତାହା ସ୍ଥିର ହେବା ଦରକାର। ନଚେତ କଂଗ୍ରେସ ରାଜ୍ୟରେ ଲୋକସଭାରେ ଶୂନ ଏବଂ ବିଧାନସଭାରେ ଅଧଡର୍ଜନକୁ ଖସିବା ଆଶଙ୍କାକୁ ଏଡାଇ ଦିଆ ଯାଇ ନ ପାରେ।