ମଦରୁ ୫୦,୦୦୦ କୋଟି ଟଙ୍କାର ରାଜସ୍ୱ ହରାଇ ସାରିଲେଣି ଓଡ଼ିଶା ସରକାର, ହେଲେ ଦଳୀୟ ଚାନ୍ଦାକୁ କମିନି ପାଉଣା

ଭୁବନେଶ୍ୱର :  ଓଡ଼ିଶାର ବହୁତ ଲୋକ ମଦ ପିଉଛନ୍ତି। ମାତ୍ର ହାତ ଗଣତି କେତେକ ବ୍ୟବସାୟୀ ଏହାର ମାଲିକାନାକୁ ଧରି ବସିଛନ୍ତି। ସେମାନଙ୍କ ପ୍ରଚ୍ଛଦପଟ୍ଟରେ ରାଜନୈତିକ ବଡ଼ପଣ୍ଡା ରହିଛନ୍ତି। ୨୧ ଜିଲ୍ଲାରେ ପ୍ରାୟ ୭୦୦ ମହୁଲି ମଦ ଭାଟି ରହିଛି। ଏହା ମଧ୍ୟରୁ ପଶ୍ଚିମ ଓଡ଼ିଶାରେ କେବଳ ୪୫୦ ଭାଟି ରହିଛି। ଏହି ସମସ୍ତ ଦୋକାନ ପୁରୁଣା ଲାଇସେନ୍ସରେ ଚାଲିଛି। ଏହାକୁ ପ୍ରତିବର୍ଷ ନବୀକରଣ କରାଯାଉଛି। ନୂଆ ଲାଇସେନ୍ସିଂ କରାଯାଉନି। ତେଣୁ ସରକାରଙ୍କୁ ବ୍ୟବସାୟୀ କିଛି ପରିମାଣର ରାଜସ୍ୱ ପ୍ରଦାନ କରି କୋଟି କୋଟି ଟଙ୍କା ବେପାର କରାଯାଉଛି ବୋଲି ପୂର୍ବତନ ଅବକାରୀ କମିସନର ସୁଦର୍ଶନ ନାୟକ କହିଛନ୍ତି। ଓଡ଼ିଶାର ଅଗ୍ରଣୀ ଡିଜିଟାଲ ମିଡିଆକୁ ଏକ ସାକ୍ଷାତକାର ଦେଇ ସେ ଏହା କହିଛନ୍ତି। ଶ୍ରୀ ନାୟକ କହିଛନ୍ତି ଯେ, ଗୋଟିଏ କ୍ୱିଣ୍ଟାଲ ମହୁଲ ଫୁଲରୁ ପ୍ରାୟ ୨୦୦ବଲ୍କ ଲିଟର ମଦ ହୋଇଥାଏ। ଏହି ସବୁ ପ୍ରକ୍ରିୟା ପାଇଁ ଲାଇସେନ୍ସକୁ ବାଦ୍ ଦେଲେ ପ୍ରାୟ ୩ରୁ ୩୫୦୦ ଟଙ୍କା ସରକାର ସର୍ବାଧିକ ଟିକସ ପାଇଥାଆନ୍ତି। ମାତ୍ର ଏଥିରୁ ବ୍ୟବସାୟୀ ପ୍ରାୟ ୩୦ ହଜାରୁ ଅଧିକ ରାଜସ୍ୱ ସଂଗ୍ରହ କରିଥାଏ।  ମଦ ବେପାରୀ ମାନେ ଗୋଟିଏ ସିପ୍ଟ ପାଇଁ ସରକାରୀ ଟିକସ ଦେଇଥାନ୍ତି। ମାତ୍ର ଭାଟି ଗୁଡିକରେ ଦୁଇରୁ ତିନି ସିପ୍ଟରେ କାମ ହୋଇଥାଏ। ତେଣୁ ସରକାର ପ୍ରତିବର୍ଷ କୋଟି କୋଟି ଟଙ୍କାର ରାଜସ୍ୱ ହରାଇଥାଆନ୍ତି। ବିଗତ ଦଶନ୍ଧିର ସରକାର ପ୍ରାୟ ୫୦ ହଜାର କୋଟି ଟଙ୍କାର ରାଜସ୍ୱ ହରାଇଥିବା ସୁଦର୍ଶନ ନାୟକ ମତ ଦେଇଛନ୍ତି। ସରକାରଙ୍କୁ ଟିକସ ଫାଙ୍କି ପ୍ରାୟ ସମସ୍ତ ରାଜନୈତିକ ଦଳକୁ ଏହି ବ୍ୟବସାୟୀମାନେ ଟଙ୍କା ଦେଉଥିବା ବିଶେଷଜ୍ଞମାନେ ମତ ରଖିଛନ୍ତି।