ବଲଓ୍ୱନ୍ତ ସିଂଙ୍କୁ ଓଡ଼ିଶା ଖଣି ନିଗମ, ସ୍ମାର୍ଟ ସିଟି ଏବଂ ବିଡିଏ ଉପ-ସଭାପତି ପଦରୁ ବିଦା କରିବାକୁ ଉଠିଲା ଦାବି  

ଭୁବନେଶ୍ୱର : ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କିଛି ଦିନ ତଳେ ଖଣି ଲୁଟେରାଙ୍କୁ ଧରି ଜେଲ୍ ପୂରାଇବା ନେଇ ମନ୍ତବ୍ୟ ରଖିଥିଲେ। ଏଥିପାଇଁ କେନ୍ଦୁଝର ଜେଲ୍ ଏବଂ ଝାରପଡ଼ା ଜେଲ୍ କୁଆଡେ ଖାଲି କରାଯାଇଛି। ତେଣୁ ଆଗାମୀ ଦିନରେ ଖଣି ସମ୍ବଦ୍ଧୀୟ ବ୍ୟାପାର ପ୍ରଶାସନିକ ଅଧିକାରୀ ସ୍ତରରେ ଅଦଳବଦଳ କରାଯିବ। ଓଡ଼ିଶା ଖଣି ନିଗମ ଏକ ଗରୁତ୍ୱପୂର୍ଣ୍ଣ ଅନୁଷ୍ଠାନ। ଏହାର ପରିଚାଳନା ନିର୍ଦ୍ଦେଶକ ଭାବେ ୨୦୦୭ ବ୍ୟାଚ୍ ଆଇଏଏସ୍ ଅଧିକାରୀ ବଲଓ୍ୱନ୍ତ ସିଂ କାର୍ଯ୍ୟ କରୁଛନ୍ତି। ସେ ଏହି ପଦରେ ତିନି ବର୍ଷରୁ ଅଧିକ ସମୟ ଧରି ରହିଲେଣି। ପଦରେ ଥାଇ ତୃତୀୟ ମହଲା ବିଶେଷ କରି ଭିନୀଲ କ୍ରିଷ୍ଣାଙ୍କ ଇସାରାରେ ନାଚୁଥିବା ପ୍ରଶାସନିକ କରିଡରରେ ଚର୍ଚ୍ଚା ହୋଇଥାଏ। ଖଣି କେଳେଙ୍କାରୀରେ ଓଏମସିର ଭୂମିକା ରହିଥିବା ନୂଆ ସରକାର ଇସାରା ଦେଇସାରିଛନ୍ତି। ତେଣୁ ଜଣେ ଅପେକ୍ଷାକୃତ ଯୁବ ଆଇଏଏସଙ୍କୁ ଏହି ପଦ ଦେବା ପାଇଁ ମୋହନ ସରକାର ଚାହୁଁଛନ୍ତି। 2009ରୁ ଏଯାବତ୍ ଅଧିକାରୀଙ୍କ ମଧ୍ୟରୁ ଜଣଙ୍କୁ ଏ ଦାୟିତ୍ୱ ଦିଆଯିବାର ଯଥେଷ୍ଟ ସମ୍ଭାବନା ରହିଛି। ଅନୁରୂପେ ଭାବେ ବଲଓ୍ୱନ୍ତ ସିଂ ଭୁବନେଶ୍ୱର ମହାନଗର ନିଗମର ଭୁବନେଶ୍ୱର ସ୍ମାର୍ଟ ସିଟି ଲିଃ ପରିଚାଳନା ନିର୍ଦ୍ଦେଶକ ଭାବେ ମଧ୍ୟ ସେ କାର୍ଯ୍ୟ କରୁଛନ୍ତି। ଏହା ମଧ୍ୟ ଏକ ଲାଭଜନକ ସଂସ୍ଥା। ପୂର୍ବ ସରକାର ଏହି ସଂସ୍ଥାର  କାର୍ଯ୍ୟରୁ ଧଳାହାତୀ ସଂସ୍ଥାକୁ ପୋଷିବା ସହ ନିର୍ବାଚନୀ ଚାନ୍ଦା ଅସୁଲ କରୁଥିଲେ। ଅଣ ଓଡ଼ିଆ ଲୋକମାନଙ୍କୁ ଥଇଥାନ କରୁଥିଲେ। ତେଣୁ ଶ୍ରୀ ସିଂଙ୍କୁ ଏହି ପଦରୁ ମଧ୍ୟ ଅପସାରଣ କରାଯାଉ ବୋଲି ବିଜେଡି ଛାଡି ବିଜେପିର ମିଶି ବିଧାୟକ ହୋଇଥିବା 4 ଜଣ ନେତା ମତ ଦେଇଛନ୍ତି। ସମାନ ଭାବେ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ ଉପ ସଭାପତି ଭାବେ ମଧ୍ୟ ବଲଓ୍ୱନ୍ତ ସିଂ କାର୍ଯ୍ୟ କରୁଛନ୍ତି। ରାଜଧାନୀ ନିର୍ମାଣ ଏବଂ ଡ୍ରେନେଜ୍ ବ୍ୟବସ୍ଥାକୁ ନେଇ ବିଏମସି ରୋଷର ଶୀକାର ହେଉଛି। ତେଣୁ ଏହି ପଦରୁ ଶ୍ରୀ ସିଂଙ୍କୁ ବିଦା କରିବା ପାଇଁ ଖୋରଧା ଜିଲାର ଜଣେ ନବ ନିର୍ବାଚିତ ବିଧାୟକ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରେ ଫେରାଦ ହୋଇଛନ୍ତି।