ଖୁବଶୀଘ୍ର ବିଜେପିରେ ସାମିଲ ହେବେ ପୂର୍ବତନ ମନ୍ତ୍ରୀ, କଥାବାର୍ତ୍ତା ଜାରି ରଖିଛନ୍ତି ଆଉ ଜଣେ ମନ୍ତ୍ରୀ

ଭୁବନେଶ୍ୱର,୬।୩ : ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ, ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବ, ତେଲକୋଇ ବିଧାୟକ ପ୍ରେମାନନ୍ଦ ନାଏକ ବିଜେଡି ଟିକେଟ୍ ରେ ବିଜୟୀ ହୋଇଥିଲେ। ମାତ୍ର ତିନି ଜଣେ ନେତା ବର୍ତ୍ତମାନ ବିଜେପିରେ ଯୋଗଦାନ କରିସାରିଲେଣି। ଆଗକୁ ଏହି ତାଲିକା ବଢିବାରେ ଲାଗିବ ବୋଲି ଆଶା କରାଯାଉଛି। ଏହି କ୍ରମରେ ରାଜ୍ୟର ଜଣେ ପୁରୁଣା ଏବଂ ଅଭିଜ୍ଞ ରାଜନେତା ଖୁବଶୀଘ୍ର ବିଜେପିରେ ଯୋଗ ଦେବାକୁ ଯାଉଛି। ସେ ଜନତା ଦଳ ସମୟରୁ ରାଜନୀତି କରି ଆସୁଛନ୍ତି। ନବୀନ ପଟ୍ଟନାୟକ ମନ୍ତ୍ରିମଣ୍ଡଳରେ ସେ ବହୁତ ଗୁରୁତ୍ୱପୂର୍ଣ୍ଣ ମନ୍ତ୍ରୀ ପଦରେ ରହିସାରିଛନ୍ତି। ଏକଦା ସେ ବାଣିଜ୍ୟ ଓ ପରିବହନ ବିଭାଗର କ୍ୟାବିନେଟ୍ ମନ୍ତ୍ରୀ ରହିଥିଲେ। ତାଙ୍କ ଜିଲ୍ଲା ଏବଂ ବିଧାନସଭା କ୍ଷେତ୍ରରେ ବିଜେପିର ପ୍ରାଧାନ୍ୟ ବୃଦ୍ଧି ପାଇବାରେ ଲାଗିଛି। ତେଣୁ ଚଳିତ ଥର ଶଙ୍ଖ ଚିହ୍ନ ଅପେକ୍ଷା ପଦ୍ମରେ ଭଲ ଭୋଟ ହେବା ବୋଲି ସେହି ଅଭିଜ୍ଞ ନେତା ମନେ କରୁଛନ୍ତି। ସେ ଉଭୟ ଲୋକସଭା ଏବଂ ବିଧାନସଭା ଲଢିବା ପାଇଁ ଚିନ୍ତା କରୁଛନ୍ତି। ଚଳିତ ମାସ ଶେଷ ସୁଦ୍ଧା ଏହି ନେତା ଜଣଙ୍କ ବିଜେପିରେ ଯୋଗ ଦେବାର ଯଥେଷ୍ଟ ସମ୍ଭାବନା ରହିଛି।  ଅନୁରୂପ ଭାବେ ନବୀନ ପଟ୍ଟନାୟକଙ୍କ ଅଧିନରେ ବର୍ତ୍ତମାନ ମନ୍ତ୍ରୀ ଥିବା ଜଣେ ବର୍ଷିୟାନ ବିଧାୟକ ମଧ୍ୟ ବିଜେପି ଯୋଗାଯୋଗରେ ରହିଛନ୍ତି। ତାଙ୍କୁ ବିଜେଡି ତାଙ୍କ ଲୋକସଭା ଆସନରୁ ଲଢିବା ପାଇଁ ପ୍ରସ୍ତାବ ଦେଇଥିଲା। ମାତ୍ର ସେ ଲୋକସଭା ଲଢିବାକୁ ଆଗ୍ରହୀ ନାହାନ୍ତି।