ନୂଆ ପ୍ରଭାରୀଙ୍କୁ ଭୂଆଁ ବୁଲାଇଲେଣି ଓଡ଼ିଶା କଂଗ୍ରେସ ନେତା, ଅଜୟ କହୁଛନ୍ତି ଗୋଟେ..ଛପୁଛି ଗୋଟେ..
ଭୁବନେଶ୍ୱର : ସ୍ଥାୟୀ ଶାସନ ସତ୍ତ୍ୱେ ଓଡ଼ିଶାର ସାମଗ୍ରିକ ବିକାଶ ଆଖି ଦୃଶିଆ ବୋଲି କଂଗ୍ରେସ ଦଳ ଅଭିଯୋଗ କରିଆସୁଛି। ଓଡ଼ିଶାର ଖଣିଜ ସମ୍ପଦର ସୁବିନିଯୋଗ ସହ ସାମାଜିକ ନ୍ୟାୟର ପୂର୍ଣ୍ଣାଙ୍ଗ କାର୍ଯ୍ୟକ୍ଷମ ଦ୍ୱାରା ରାଜ୍ୟର ପ୍ରକୃତ ରୂପାନ୍ତରଣ କରାଯାଇପାରିବ। ଏହି କଥା ଡେରିରେ ହେଉ ପଛେ ଏଆଇସିସି ବୁଝିବା ପାଇଁ ଚେଷ୍ଟା କରିଥିଲା। ସେଥିପାଇଁ ଓଡ଼ିଶା ପ୍ରଭାରୀ ଅଜୟ କୁମାର ମଧ୍ୟ ଯତ୍ନଶୀଳ ଥିଲେ। ପ୍ରଥମ ଦିନର ଅଭିଭାଷଣରେ ଦୁଇ ଲକ୍ଷ କୋଟି ଖଣି ଦୁର୍ନୀତି ସମ୍ପର୍କରେ ମତ ରଖିଥିଲେ। ଏହାକୁ ବୁଝାଇ ମଧ୍ୟ କହିଥିଲେ। ବିଜେପି-ବିଜେଡି ସମ୍ପର୍କର ପ୍ରକୃତ ଖିଅ ଖଣି ମାଫିଆ ଏବଂ ଖଣି ଦୁର୍ନୀତିରେ ରହିଛି। ଧାନର ପ୍ରକୃତ ମୂଲ୍ୟ ମିଳୁନାହିଁ, ମାତ୍ର ଖଣି ମାଫିଆଙ୍କ ଜରିମାନା ଛାଡ ହେଉଛି ବୋଲି ଶ୍ରୀ କୁମାର କହିଥିଲେ। ମାତ୍ର ବିଳମ୍ବିତ ରାତିରେ ଯେତେବେଳେ ଛାପା ଗଣମାଧ୍ୟମ ପାଇଁ ପ୍ରେସ୍ ରିଲିଜ୍ ପ୍ରସ୍ତୁତ କରାଗଲା। ସେତେବେଳେ ଏହି ପ୍ରସଙ୍ଗକୁ କେବଳ ଗୋଟିଏ ଶବ୍ଦ ‘ଖଣି ଦୁର୍ନୀତି’ରେ ସୀମିତ କରି ଦିଆଗଲା। ଏହା କାହିଁକି ହୋଇଛି ବୋଲି ସ୍ୱତନ୍ତ୍ର ଭାବେ ଏହାର ଅନୁଧ୍ୟାନ କରାଯାଉଥିବା ଜଣାପଡିଛି।
ଓଡ଼ିଆ-ଅଣ ଓଡ଼ିଆ, ଭିତର-ବାହାର ଭଳି ଗଣମାଧ୍ୟମକୁ ସରଗରମ କରୁଥିବା ଖବରକୁ ଛଡ଼ାଗଲା। ଅନ୍ୟ ସବୁ ବିଷୟକୁ ଗୌଣ ଭାବେ ପ୍ରଦର୍ଶନ କରାଗଲା। ଏହା କାହିଁକି ହେଲା ବୋଲି ପ୍ରଶ୍ନବାଚୀ ସୃଷ୍ଟି ହୋଇଛି। ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ, ସାଂସଦ ଅପରାଜିତା ସିହ୍ନା ଷଡଙ୍ଗୀ, କଂଗ୍ରେସ ନେତା ବିଜୟ ରାଓ ପଟ୍ଟନାୟକ, ସନ୍ତୋଷ ସିଂ ସାଲୁଜାଙ୍କ ମୂଳ ପରିଚୟ କଣ ଓଡ଼ିଆ କି। ଅତୀତରେ କଂଗ୍ରେସ ନେତା ପି.ଭି ନରସିଂହରାଓ ବ୍ରହ୍ମପୁରରୁ ଲୋକସଭା ଲଢିଥିଲେ। ଧର୍ମେନ୍ଦ୍ର ପ୍ରଧାନ ମଧ୍ୟପ୍ରଦେଶରୁ ରାଜ୍ୟସଭା ଯାଇଛନ୍ତି, ତାଙ୍କ ପ୍ରାର୍ଥୀତ୍ୱ କଣ ମଧ୍ୟ ପ୍ରଦେଶ ଅସ୍ମିତା ପାଇଁ ବିପଦଜ୍ଜନକ। ପୂର୍ବରୁ ସେ ବିହାରରୁ ମଧ୍ୟ ରାଜ୍ୟସଭା ଯାଇଥିଲେ। ମୋଦି ଗୁଜରାଟ ଛାଡି ୟୁପି ଆସିଲେ। ଆଗାମୀ ଦିନରେ ଶାହା, ନୀତିଶ, ଖଡଗେ ଉତ୍ତର ଭାରତରେ ଛିଡା ହେବାର ସମ୍ଭାବନା ରହିଛି। ତେଣୁ ଏହି ଓଡ଼ିଆ-ଅଣ ଓଡ଼ିଆ ପ୍ରସଙ୍ଗକୁ କଂଗ୍ରେସ କେତେବାଟ ନେବ ବୋଲି ତାହା ଚର୍ଚ୍ଚାର କାରଣ ହୋଇଛି। ଅଜୟ କୁମାର ଓଡ଼ିଶା କଂଗ୍ରେସ ପ୍ରଭାରୀ ନାଁ ଓଡ଼ିଶାର ଜନ୍ମିତ ଅନଭିଜ୍ଞ ଠିକାଦାରଙ୍କ ପ୍ରତିନିଧି ବୋଲି ମଧ୍ୟ ବୁଦ୍ଧିଜୀବୀମାନେ ମତ ରଖିଛନ୍ତି।
