ଭଲକିନି ଚୂନା ଲଗେଇଥିଲେ ସର୍ଭେ ସଂସ୍ଥା, ଅତି ଚାଲାକିରୁ ବାଉଳା ହେଲେ ନବୀନ-ପାଣ୍ଡିଆନ୍
ଭୁବନେଶ୍ୱର : ଧାମନଗର ଉପନିର୍ବାଚନକୁ ହାଲୁକା ଭାବେ ନେଇଥିବା ବିଜେଡି ପଦ୍ମପୁର ଉପନିର୍ବାଚନରୁ ସକ୍ରିୟ ହୋଇଥିଲା। ଏହି କ୍ରମରେ ବିଜେଡି ଦେଶର ଜଣାଶୁଣା ନିର୍ବାଚନ ପ୍ରକ୍ରିୟା ପରିଚାଳନା ସହଯୋଗୀ ପ୍ରଶାନ୍ତ ପାଣ୍ଡେ ଓରଫ୍ ପ୍ରଶାନ୍ତ କିଶୋରଙ୍କ ସହ ଯୋଗାଯୋଗ କରିଥିଲା। ବିଜେଡିର ନମ୍ବର ଦୁଇ କୁହାଯାଉଥିବା ତତ୍କାଳୀନ ଅଧିକାରୀ ତଥା ଭି.କେ ପାଣ୍ଡିଆନ ଏବଂ କେତେକ ବାବୁ ପ୍ରଶାନ୍ତଙ୍କ ସହ ଆଲୋଚନା କରୁଥିଲେ। ବିଜେଡି ପ୍ରଶାନ୍ତଙ୍କ ସହ ଯୋଗାଯୋଗ କରୁଥିବା ଖବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପଲିଟିକାଲ୍ ଟିମ୍ ଏବଂ ଅମିତ ଶାହାଙ୍କ ପାଖରେ ମଧ୍ୟ ରହିଥିଲା। ପ୍ରଶାନ୍ତଙ୍କ ସହ ବିଜେଡିର ପରିଚାଳନାକାରୀ ସବୁ ଆଲୋଚନା କରିଥିଲେ। ପ୍ରତି ନିର୍ବାଚନମଣ୍ଡଳୀରେ ତନ୍ନତନ୍ନ କରି ସମୀକ୍ଷା କରାଯାଇଥିଲା। କେଉଁ ଆସନରେ କାହାକୁ ଅଣାଯିବ, କାହାକୁ ଟିକେଟ୍ ଦିଆ ଯିବ ନାହିଁ, ସେ ନେଇ ଏକ ଚିଠା ପ୍ରସ୍ତୁତ ହୋଇଥିଲା। ହେଲେ ଏହି କାମ ପ୍ରଶାନ୍ତଙ୍କ ସଂସ୍ଥା ଆଇ –ପ୍ୟାକ୍ କରି ନ ଥିଲା। ବିଜେଡି ପାଇଁ ଅନ୍ୟ ଏକ ନାଁରେ ନୂଆ କମ୍ପାନୀ ଖୋଲାଯାଇଥିଲା। ମାତ୍ର ଏଥିରେ ପ୍ରଶାନ୍ତଙ୍କ ସହଯୋଗୀମାନେ ପ୍ରତ୍ୟକ୍ଷ ଭାବେ ଜଡିତ ହୋଇଥିଲେ। ପ୍ରଶାନ୍ତ ବିଜେଡି ଏବଂ ବିଜେପି ମଧ୍ୟରେ ଏକ ଯୋଗସୂତ୍ରକାରୀ ମଧ୍ୟ ହୋଇପାରିବେ, ଏ ଧାରଣା ମଧ୍ୟ ଜନ୍ମିଥିଲା। ମେଣ୍ଟ କଥା ଚର୍ଚ୍ଚା ହେବା ପରେ ତୃଣମୂଳ ଫିଡ୍ ବ୍ୟାକ୍ ସଂଗ୍ରହ କରିଥିଲା ଏହି ସଂସ୍ଥା।
ଏହା ପରେ ନବୀନ ହିଁ ବ୍ରାଣ୍ଡ-ଶଙ୍ଖ ଚିହ୍ନ ହିଁ ମୂଳ। ଏହି ଆଧାରରେ ଯେ କୌଣସି ପ୍ରାର୍ଥୀଙ୍କୁ ଜିତାଯାଇପାରିବ। 24 ବର୍ଷର ଶାସନ ବିରୋଧୀ ହାଓ୍ୱାକୁ ଅତି ହାଲୁକା ଭାବେ ନେବାର ଏକ ବାତାବରଣ କରାଯାଇଥିଲା। ଏଠାରେ ପ୍ରଶ୍ନ ଉଠେ-ପୂର୍ବ ନିର୍ବାଚନରେ କଣ ଏସବୁ ହୋଇ ନ ଥିଲା। ହୋଇଥିଲା ମାତ୍ର ଦଳର ଏକ ରାଜନୈତିକ ଗ୍ରୁପ୍ ପ୍ରତ୍ୟକ୍ଷ ଭାବେ ସକ୍ରିୟ ରହିଥିଲେ। ଯାହା ଚଳିତ ଥର ନ ଥିଲା। ବିଜେଡିର କୋର୍ ଗ୍ରୁପ୍ ନିର୍ବାଚନୀ ପରିଚାଳନା ଦକ୍ଷତାରେ ଦୁର୍ବଳ ରହିଥିଲା। ତେଣୁ ତାଲିକା କରି କଟାଯାଇଥିବା ନାଁ ଗୁଡିକ ଚତୁରତାର ସହ ବିଜେପି ଦିଲ୍ଲୀ ଅଫିସରେ ପହଞ୍ଚିଥିଲା। ଆଉ ସେହି ଅନୁସାରେ ବିଜେପିର ଟିକେଟ୍ ଚୟନ ହୋଇଥିଲା। ଶେଷ ପର୍ଯ୍ୟାୟରେ ହୋଇଥିବା ଟିକେଟ୍ ଚୟନରେ ଏହି ରଣନୀତି ବେଶ୍ କାମ କରିଥିଲା। ଆଇଟି ସେଲ୍ ଦ୍ୱାରା ପ୍ରସ୍ତୁତ ଭିଡିଓ ତୃଣମୂଳରେ ବ୍ୟାପକ ପରିମାଣରେ ଭାଇରାଲ କରାଯାଇଥିଲା। ଏଥିପାଇଁ ଆଉ ଏକ ସଂସ୍ଥା ବିଜେପିର କାମ କରୁଥିଲା। ଲୋକସଭାରେ ଦୁର୍ବଳ ପ୍ରାର୍ଥୀ ଦେଇ ବିଜେପିକୁ ନରମ ରଖିବା ରଣନୀତି ପାଣ୍ଡିଆନଙ୍କର ଥିଲା। ଏହାକୁ କାଏମ୍ ରଖିବା ପାଇଁ ବିଜେଡିକୁ ଉକ୍ତ ସଂସ୍ଥା ମଧ୍ୟ କହିଥିଲା।
ହେଲେ ବିଜେଡି ସେତେବେଳକୁ ପୁରୀ ଟ୍ରାପ୍ ରେ ପଡିଯାଇଥିଲା। କଂଗ୍ରେସ ହାଇକମାଣ୍ଡ ଯାହା ବୁଝି ପାରି ପ୍ରଶାନ୍ତଙ୍କୁ କାମ ଆରମ୍ଭ କରିବା ପାଇଁ କହି ନ ଥିଲେ। ସେଥିରୁ ବିଜେଡି କିଛି ଶିଖି ନ ଥିଲା। ପ୍ରଶାନ୍ତଙ୍କ ପୂର୍ବ ସହଯୋଗୀ ପରେ ଏନେଇ ଖୁଲାସା କରିଥିଲେ। 2014 ନିର୍ବାଚନ ପୂର୍ବରୁ 2012ରେ ପ୍ରଶାନ୍ତ ମୋଦିଙ୍କୁ ସହଯୋଗ କରିଥିଲେ। ଏହା ପରେ ହଠାତ୍ ସେ ମୋଦିଙ୍କୁ ଛାଡିଥିଲେ। ଏହା ପରେ ନୀତିଶ କୁମାର, କଂଗ୍ରେସ ଓ ସମାଜବାଦୀ ପାର୍ଟିକୁ ୟୁପି, ପଞ୍ଜାବରେ ଅମରିନ୍ଦର ସିଂ, ଆନ୍ଧ୍ର ପ୍ରଦେଶରେ ଜଗନ, ପଶ୍ଚିମବଙ୍ଗରେ ମମତା, ଦିଲ୍ଲୀରେ କେଜ୍ରିଓ୍ୱାଲ ଓ ତାମିଲନାଡୁରେ ଡିଏମକେକୁ ସହଯୋଗ କରିଥିଲେ। ଏହି ସମୟରେ ଏହିସବୁ ରାଜ୍ୟ ଓ ଦଳର ରଣନୀତି ସମ୍ପର୍କିତ ଏକ ତଥ୍ୟ ବିଜେପି ଶୀର୍ଷ ନେତୃତ୍ୱକୁ ପ୍ରଦାନ କରିଥିବା ବିଜେଡିରେ ଗୁଞ୍ଜରଣ ହେଉଛି। 2024ରେ ନବୀନଙ୍କୁ ଟାର୍ଗେଟ କରି ବିଜେପି ସଫଳ ହୋଇପାରିବ ନାହିଁ। ମାତ୍ର ପାଣ୍ଡିଆନଙ୍କୁ ଟାର୍ଗେଟ ଓ ସିଷ୍ଟମ ଦ୍ୱାରା ଏହାର ପ୍ରଚାର ବିଜେପିକୁ ସଫଳ କରିଥିଲା। ଅନ୍ୟ ଏକ ସର୍ଭେକ୍ଷଣ ସଂସ୍ଥା ପାଣ୍ଡିଆନଙ୍କ ପ୍ରଚାର ନକରାତ୍ମକ ପ୍ରଭାବ ପକାଉଥିବା କହିଥିଲେ। ମାତ୍ର ଅନ୍ୟ ଜଣେ ପ୍ରଶାସକ ଏହା ପାଣ୍ଡିଆନଙ୍କ କାମ ତଥା ମଗଜରେ ପୂରେଇ ପାରିଲେ ନାହିଁ। ଯାହାର ଫଳାଫଳ ନିର୍ବାଚନରେ ପ୍ରତିଫଳିତ ହେଲା। ଏହି କଥା ପୂର୍ବରୁ ଓଡ଼ିଶାରେ ଥିବା ଜଣେ ପ୍ରଶାସକ ଯିଏ ବିହାରରେ ବର୍ତ୍ତମାନ ରାଜନେତା, ସେ ନୀତିଶଙ୍କ ମଧ୍ୟମରେ ନବୀନଙ୍କୁ ଅବଗତ କରାଇଥିବା ଜଣାପଡିଛି।
