ମୂଳ ପର୍ଯ୍ୟବେକ୍ଷକ ଜିଲ୍ଲା ଯାଉ ନାହାନ୍ତି, ପ୍ରକ୍ସି ତଥା କା’ ନେତାଙ୍କ କାର୍ଯ୍ୟ କର୍ମୀ ମହଲରେ ଆଣୁଛି ଅସନ୍ତୋଷ, ଅଭିଯୋଗରୁ ବାଦ୍ ନାହାନ୍ତି ସାଙ୍ଗଠନିକ ସମ୍ପାଦକ ବବି

ଭୁବନେଶ୍ୱର :  ୨୦୨୩ ସରି ଆସୁଥାଏ। ୨୦୨୪ ହେବାକୁ ବସିଥାଏ। ଏହି ସମୟରେ ସମସ୍ତେ ନିଜ ନିଜର ସ୍ମୃତି ସାମାଜିକ ଗଣମାଧ୍ୟମରେ ସାଉଁଟୁ ଥାଆନ୍ତି। ଏହା ମଧ୍ୟରେ ଗୋଟିଏ ଫେସବୁକ୍ ପୋଷ୍ଟ ସମସ୍ତଙ୍କ ଦୃଷ୍ଟି ଆକର୍ଷଣ କଲା। ଏହା ଥିଲା ଯେ, ରାଜ୍ୟରେ ଜଣେ ଛାୟା ମୁଖ୍ୟମନ୍ତ୍ରୀ, ଜଣେ ଅବସର ସମୟ ଅତିକ୍ରାନ୍ତ କରୁଥିବା ମୁଖ୍ୟ ଶାସନ ସଚିବ ଏବଂ କାମଚଳା ଭାରାପ୍ରାପ୍ତ ପୁଲିସ୍ ମହାନିର୍ଦ୍ଦେଶକରେ ଚାଲୁଛି। ଇଏତ ଗଲା ଶାସନ ବ୍ୟବସ୍ଥା କଥା। ରାଜ୍ୟର ପ୍ରମୁଖ ରାଜନୈତିକ ଦଳ ବିଜେଡିର ସାଙ୍ଗଠନିକ କାର୍ଯ୍ୟ ମଧ୍ୟ ପ୍ରକ୍ସି ତଥା କା ଦ୍ୱାରା ପରିଚାଳିତ ହେଉଛି। ଜିଲ୍ଲା ସ୍ତରରେ ଅସଲ ପର୍ଯ୍ୟବେକ୍ଷକମାନଙ୍କ ବଦଳରେ ଏହି ପ୍ରକ୍ସି ପର୍ଯ୍ୟବେକ୍ଷକ ଏବେ ସଙ୍ଗଠନରେ କଣ୍ଟା ସାଜିଛନ୍ତି। କୋରାପୁଟ, ସମ୍ବଲପୁର, କେନ୍ଦୁଝର ଆଦି ଜିଲ୍ଲାରେ ଏହା ଅନୁଭୂତ ହେବାରେ ଲାଗିଛି। ପ୍ରକ୍ସି ପର୍ଯ୍ୟବେକ୍ଷକଙ୍କ କେନ୍ଦୁଝର ଜିଲ୍ଲାରେ ଏତେ ଅଭ୍ୟୁଦୟ ହେଲା ଯେ, ଦଳ ସମର୍ଥନରେ ସରପଞ୍ଚ ହୋଇଛିବା ୧୯ ଜଣଙ୍କୁ ଦଳ ଛାଡିବାକୁ ପଡିଲା। ଏମିତି କି ବିଧାୟକଙ୍କୁ ମଧ୍ୟ ଇସ୍ତଫା ପତ୍ର ଲେଖିବାକୁ ପଡିଲା। ପ୍ରକ୍ସି ପର୍ଯ୍ୟବେକ୍ଷକମାନେ ଜିଲ୍ଲାସ୍ତରରେ ସଙ୍ଗଠନ ଦେଖିବା ଅପେକ୍ଷା ଆର୍ଥିକ ସ୍ଥିତି ଭଲ ଥିବା ଲୋକଙ୍କ କଥାରେ ପରିଚାଳିତ ହେବାରେ ଲାଗିଛନ୍ତି। ସାଧାରଣ କର୍ମୀ ଅପେକ୍ଷା ମୋଟା ସୁନା ଟେନ୍, ଥର କି ଡଷ୍ଟର ଗାଡ଼ି ଧରୁଥିବା ଲୋକଙ୍କ ଦ୍ୱାରା ପ୍ରଭାବିତ ହେଉଛନ୍ତି। ଜଣେ ବିଧାୟକ ଭଦ୍ରକ ଜିଲ୍ଲାରେ ବର୍ଷକ ପୂର୍ବରୁ ଏମିତି କାରନାମା କଲେ ଯେ, ଯାଜପୁର-ଭଦ୍ରକ ବିବାଦ ହୋଇଗଲା। ପରିସ୍ଥିତି ଏପରି ହେଲା ଯେ, ତୃତୀୟ ମହଲା ସଞ୍ଜୟ କୁମାର ଦାସବର୍ମାଙ୍କୁ ପର୍ଯ୍ୟବେକ୍ଷକ କଲା।

ଅନୁରୂପ ଭାବେ କୋରାପୁଟରେ ବିଜେଡି ଏପରି ପ୍ରକ୍ସି ପର୍ଯ୍ୟବେକ୍ଷକ, ମୂଳ ପର୍ଯ୍ୟବେକ୍ଷକଙ୍କ ଅନୁପସ୍ଥିତି ଦଳର ଲୋକପ୍ରିୟତା ବୃଦ୍ଧିରେ ସହାୟକ ହେଉନାହିଁ। ଜିଲ୍ଲାରେ ଥିବା ବିଧାୟକମାନଙ୍କୁ ଏହି ପ୍ରକ୍ସି ପର୍ଯ୍ୟବେକ୍ଷକ ଖରାପ ବ୍ୟବହାର କରୁଛନ୍ତି। ଯାହା ଆଦିବାସୀ ଓ ଅନୁସୂଚିତ ନେତାଙ୍କୁ ଅପମାନିତ ବୋଧ ପରି ଲାଗୁଛି। ମାଲକାନଗିରିରେ ଏହି ପରିସ୍ଥିତିରୁ ବିରୋଧି ବିଜେପି ବହୁତ ଫାଇଦା ସାଉଁଟିବାରେ ଲାଗିଛି। ରାଜ୍ୟ ସରକାରଙ୍କ ଗୁଇନ୍ଦା ତଥ୍ୟ ଅନୁଯାୟୀ ନବରଙ୍ଗପୁର ଲୋକସଭା ଆସନ ବିଜେଡି ହାତରୁ ଚାଲିଗଲେ ଆଶ୍ଚର୍ଯ୍ୟ ହେବାର ନାହିଁ ବୋଲି କୁହାଗଲାଣି। ଦଳର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଏକାଧିକ ଜିଲ୍ଲା ଦାୟିତ୍ୱରେ ରହିଛନ୍ତି। ତେଣୁ ପ୍ରକ୍ସିଙ୍କ ଦ୍ୱାରା କାମ ଚଳାଇବା ଅଭିଯୋଗ ବବିଙ୍କ ଦକ୍ଷତା ଉପରେ ମଧ୍ୟ ପ୍ରଶ୍ନବାଚୀ ସୃଷ୍ଟି କରୁଛି। ଏସବୁ ଜାଣିବା ପରେ ତୃତୀୟ ମହଲା ଏବଂ ବିଜେଡି ଶୀର୍ଷ ନେତୃତ୍ୱର ନୀରବତା ମଧ୍ୟ ଅନେକଙ୍କୁ ବିସ୍ମିତ କରିଛି। ପ୍ରକ୍ସି ପର୍ଯ୍ୟବେକ୍ଷକଙ୍କ ଉପରେ ନିର୍ଭରକରି ମାସକୁ ଥରେ ଦୁଇ ଥର ମାତ୍ର ଜିଲ୍ଲା ଗସ୍ତ କରୁଛନ୍ତି ମୂଳ ପର୍ଯ୍ୟବେକ୍ଷକ। ଏହା ଦ୍ୱାରା ସାଙ୍ଗଠନିକ କାର୍ଯ୍ୟ କାମଚଳା ପରି ମନେ ହେଉଛି ବୋଲି କର୍ମୀମାନେ ଆଲୋଚନା କରୁଛନ୍ତି।