ବଦଳୁଛି ସମ୍ବଲପୁର-ରେଢାଖୋଲ ବିଧାନସଭା ରାଜନୀତିର ପ୍ରାକ୍ ଦୃଶ୍ୟପଟ୍ଟ, ଧର୍ମେନ୍ଦ୍ରଙ୍କ ଯୋଗାଯୋଗରେ ବିଜେଡି ନେତା, ନେତ୍ରୀ…
ସମ୍ବଲପୁର : ସାଧାରଣ ନିର୍ବାଚନ ପାଖେଇ ଆସିଲାଣି। ରାଜଧାନୀକୁ ବାଦ୍ ଦେଲେ ଯେଉଁଠି ପରିବେଶ ଅଧିକ ଉଷ୍ମ, ସେ ସ୍ଥାନ ହେଉଛି ସମ୍ବଲପୁର। ସମ୍ବଲପୁର ଚର୍ଚ୍ଚାରେ ରହିବା ପାଇଁ ସବୁ ଉପାଦାନ ରହିଛି। କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି ଲୋକସଭା ଆସନରୁ ନିର୍ବାଚନ ଲଢିବେ। ତାଙ୍କୁ ମୁକାବିଲା କରିବା ପାଇଁ ଭି.କେ ପାଣ୍ଡିଆନ୍ ନିଜର ଏକାନ୍ତ ଅନୁଗତ ପ୍ରଣବ ପ୍ରକାଶ ଦାସଙ୍କୁ ପ୍ରାଥମିକ ଇସାରା ଦେଇଛନ୍ତି। ଏକଥା ପ୍ରଣବ ପ୍ରକାଶ ନିକଟରେ ଗଣମାଧ୍ୟମକୁ ସୂଚନା ଦେଇଥିଲେ। ସେହିପରି ଦୀର୍ଘଦିନ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡ଼ିଶା ଆସୁଛନ୍ତି। ତାହା ପୁଣି ସମ୍ବଲପୁରକୁ। ନିର୍ବାଚନ ବିଗୁଲ୍ ଅଣ ଆନୁଷ୍ଠାନିକ ଭାବେ ସମ୍ବଲପୁରରେ ହିଁ ବାଜିବାକୁ ଯାଉଛି। ଏହା ମଧ୍ୟରେ ପୂର୍ବ ରାଜନୈତିକ ଅଙ୍କ କଷା ପୁରୁଣା ସମୀକରଣକୁ ବଦଳାଉଛି।
ଅତ୍ୟନ୍ତ ବିଶେଷ ସୂତ୍ରରୁ ମିଳିଥିବା ଖବର ଅନୁଯାୟୀ, ନିକଟରେ ପୂର୍ବତନ ମନ୍ତ୍ରୀ ତଥା ରେଢାଖୋଲ ବିଧାୟକ ରୋହିତ ପୂଜାରୀଙ୍କୁ ସମ୍ବଲପୁର ଏବଂ ରେଢାଖୋଲ ବିଧାନସଭା ଉପରେ ଫୋକସ୍ କରିବାକୁ କୁହାଯାଇଛି। ବିଶେଷ କରି ସମ୍ବଲପୁର ଉପରେ ଅଧିକ ଫୋକସ୍ କରିବାକୁ କୁହାଯାଇଛି। ଶ୍ରୀ ପୂଜାରୀ ମଧ୍ୟ ନିଜ ନିର୍ବାଚନୀ ଓ୍ୱାର ରୁମ୍ ପ୍ରସ୍ତୁତ କରି ସମ୍ବଲପୁର-ରେଢାଖୋଲ ଏବଂ ଭୁବନେଶ୍ୱରରୁ ପ୍ରସ୍ତୁତି ଆରମ୍ଭ କରି ଦେଇଛନ୍ତି। ରୋହିତଙ୍କୁ ସମ୍ବଲପୁରରେ ପ୍ରାଧାନ୍ୟ ଦିଆଯାଉଥିବାରୁ ଗତଥର ପ୍ରାର୍ଥିନୀ ହୋଇଥିବା ରାସେଶ୍ୱରୀ ପାଣିଗ୍ରାହୀ ବିଜେଡିରେ ନିଜ ରାଜନୈତିକ ଭବିଷ୍ୟତ ଦେଖିପାରୁନାହାନ୍ତି। ଇତି ମଧ୍ୟରେ ରାସେଶ୍ୱରୀଙ୍କୁ ଶୁଭେଚ୍ଛୁମାନେ ବିଜେପି ନେତା ତଥା କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ଯୋଗସୂତ୍ରରେ ରହିଛନ୍ତି। ସମ୍ବଲପୁର ନ ହେଲେ ଯଦି ପରିସ୍ଥିତି ବାଧ୍ୟ କରେ ତେବେ ରାସେଶ୍ୱରୀ ପାଣିଗ୍ରାହୀ କିମ୍ବା ତାଙ୍କ ପରିବାରରୁ କେହି ରେଢାଖୋଲରେ ଗୈରିକ ଦଳରୁ ପ୍ରାର୍ଥୀ ହେବାର ସମ୍ଭାବନାକୁ ଏଡ଼ାଇ ଦିଆ ଯାଇ ନ ପାରେ ବୋଲି ରାଜନୈତିକ ସମୀକ୍ଷକମାନେ କହିଛନ୍ତି।
