ଏହି ତିନି ଯୁବତୀଙ୍କ ପ୍ରଦର୍ଶନ ଉପରେ ରହିବ ସଭିଙ୍କ ନଜର….

 ଚଳିତ ବର୍ଷ ହେବାକୁ ଥିବା ସାଧାରଣ ନିର୍ବାଚନରେ ଅନେକ ନୂଆ ଚେହେରା ଦେଖିବାକୁ ମିଳିବ। ହେଲେ ସେମାନଙ୍କ ମଧ୍ୟରୁ ତିନୋଟି ଯୁବ ଚେହେରାଙ୍କ ଉପରେ ଟିକେ ବେଶୀ ନଜର ରହିବ। ପୂର୍ବାପେକ୍ଷା ଦଳ ଗୁଡ଼ିକ ମହିଳା ପ୍ରାର୍ଥୀଙ୍କ ସଂଖ୍ୟା ବୃଦ୍ଧି କରିବା ପାଇଁ ଲକ୍ଷ୍ୟ ରଖିଛନ୍ତି। ଏହାକୁ ଦୃଷ୍ଟିରେ ରଖି ତିନି ଉଚ୍ଚ ଶିକ୍ଷିତା ମହିଳା ପ୍ରଥମ ଥର ପାଇଁ ନିର୍ବାଚନ ଲଢିପାରନ୍ତି। ଏହି ତିନି ଜଣେ ହେଲେ ନବରଙ୍ଗପୁର ଡାବୁ ଗାଁର ଡାକ୍ତର ଲିପିକା ମାଝୀ , ବରଗଡ଼ ଜିଲ୍ଲା ବିଜେପୁରର ନିହାରିକା ଗିରି ଏବଂ କେନ୍ଦ୍ରାପଡ଼ା ଜିଲ୍ଲା ଆଳିରୁ ଡାକ୍ତର ଦେବସ୍ମିତା ଶର୍ମା। ଡାକ୍ତର ଲିପିକା ମାଝୀ କଂଗ୍ରେସରୁ ନବରଙ୍ଗପୁର ଲୋକସଭା କିମ୍ବା ଡାବୁ ଗାଁ ବିଧାନସଭାରୁ ପ୍ରାର୍ଥୀ ହୋଇପାରନ୍ତି। ସେ ପୂର୍ବତନ ବିଧାୟକ ଭୁଜବଳ ମାଝୀଙ୍କ କନ୍ୟା। ଗତ ପଞ୍ଚାୟତ ନିର୍ବାଚନରେ ତୃଣମୂଳରେ ତାଙ୍କୁ ବେଶ୍ ସକ୍ରିୟ ଥିବା ଲକ୍ଷ୍ୟ କରାଯାଇଥିଲା। ନିୟମିତ ରାଜନୈତିକ କାର୍ଯ୍ୟକ୍ରମ ଜାରି ରଖିବା ସହ ପୁରା ନବରଙ୍ଗପୁର ବୁଲୁଛନ୍ତି। ଲିପିକା ବର୍ତ୍ତମାନ ଜିଲ୍ଲା ପରିଷଦ ସଦସ୍ୟା ରହିଛନ୍ତି। ସେ ଡାବୁ ଗାଁରୁ ବିଧାୟକ ଭାବେ ଲଢିବା ସମ୍ଭାବନା ଅଧିକ ରହିଛି। ବର୍ତ୍ତମାନ ଡାବୁ ଗାଁରୁ ମନୋହର ରନ୍ଧାରୀ ପ୍ରାର୍ଥୀ ଅଛନ୍ତି। ଅନୁରୂପ ଭାବେ ବରଗଡ଼ ଜିଲ୍ଲା ବିଜେପୁରରେ ବିଜେଡିରୁ ଲଢିବା ପାଇଁ ନିହାରିକା ଗିରି ଆଗ୍ରହୀ ଅଛନ୍ତି। ରାଜ୍ୟ ସ୍ତରୀୟ ଯୁବ ବିଜୁ ଜନତା ଦଳରେ ସକ୍ରିୟ ରହିବା ପରେ ନିହାରିକା ଏବେ ବିଜେପୁରରେ ସାଙ୍ଗଠନିକ କାର୍ଯ୍ୟକ୍ରମ ଜାରି ରଖିଛନ୍ତି। ବିଜେପୁର, ବରପାଲି ଏବଂ ଗାଇସିଲଟରେ କାର୍ଯ୍ୟକ୍ରମ ଜାରି ରଖିଛନ୍ତି। ବର୍ତ୍ତମାନ ରିତା ସାହୁ ସେହି ସ୍ଥାନରୁ ବିଧାୟିକା ସହ ରାଜ୍ୟ ମନ୍ତ୍ରିମଣ୍ଡଳରେ ମନ୍ତ୍ରୀ ରହିଛନ୍ତି। ନିହାରିକା ବିଶିଷ୍ଟ ନାରୀ ନେତ୍ରୀ ପାର୍ବତୀ ଗିରିଙ୍କ ନାତୁଣୀ। ତେଣୁ ପାରିବାରିକ ଜନସମ୍ପର୍କ ପୁଞ୍ଜି, ଶିକ୍ଷାଗତ ଯୋଗ୍ୟତା ତାଙ୍କୁ ବିଜେପୁର ବିଜେଡି ଟିକେଟ୍ ଦୃଢ ଦାବିଦାର କରି ଛିଡା କରିଛନ୍ତି। ଏହି ଦୁଇ ଜଣଙ୍କୁ ବାଦ୍ ଦେଲେ କେନ୍ଦ୍ରାପଡ଼ା ଜିଲ୍ଲା ଆଳିରୁ ଦେବେନ୍ଦ୍ର ଶର୍ମାଙ୍କ ଝିଅ ଡକ୍ଟର ଦେବସ୍ମିତା ଶର୍ମା ପ୍ରାର୍ଥୀ ହେବାର ସମ୍ଭାବନା ରହିଛି। କଂଗ୍ରେସ ଦଳରୁ ଦେବସ୍ମିତା ବିଧାୟକ ପ୍ରାର୍ଥୀ ହେବେ। ନିକଟରେ ସରକାରୀ ଚାକିରୀରୁ ଇସ୍ତଫା ଦେଇ ଶ୍ରୀମତୀ ଶର୍ମା ନିଜର ରାଜନୈତିକ କାର୍ଯ୍ୟକ୍ରମ ଜାରି ରଖିଛନ୍ତି। ଦେବସ୍ମିତା ପୂର୍ବରୁ ୨୦୧୪ଏବଂ ୨୦୧୯ ନିର୍ବାଚନ ପରିଚାଳନାରେ ପିତା ଦେବେନ୍ଦ୍ର ଶର୍ମାଙ୍କୁ ପ୍ରତ୍ୟକ୍ଷ ସହଯୋଗ କରୁଥିବାର ଲକ୍ଷ୍ୟ କରାଯାଇଥିଲା।