ବାରଣ ସତ୍ତ୍ୱେ ବସି ରହିଲେ ବବି….ମାଇକ୍ ଘୋଷଣା କରି ନୟାନ୍ତ ହେଲେ ଦେବୀ…….ନିଚ୍ଛକ ସତ କହିଦେଲେ ଅରୁଣ…

ଭୁବନେଶ୍ୱର :  ‘ବର୍ତ୍ତମାନ ଉପଦେଷ୍ଟା କମିଟି, ସଦସ୍ୟତା ଅଭିଯାନ କମିଟି ଏବଂ କାର୍ଯ୍ୟକ୍ରମ ପରିଚାଳନା କମିଟିରେ ବୈଠକ ହେବ। ଯେଉଁମାନେ ଏହି ତିନୋଟି କମିଟିର ସଦସ୍ୟ ନାହାନ୍ତି, ସେମାନେ ଦୟାକରି ବାହାରକୁ ଯାଆନ୍ତୁ। କାହାରିକୁ ବ୍ୟକ୍ତିଗତ ଭାବେ କହୁନାହିଁ, ଏହା ପାର୍ଟି କଥା। ପ୍ଲିଜ… କୋ ଅର୍ଡିନେଟ୍ ‘ ଏହା ଥିଲା ବିଜେଡିର ବରିଷ୍ଠ ନେତା ଦେବୀ ପ୍ରସାଦ ମିଶ୍ରଙ୍କ କଥା। ଯାହା ଗତ ଦଳୀୟ ବୈଠକ ପୂର୍ବରୁ ସେ କହିଥିଲେ। ମାତ୍ର ତାଙ୍କ କଥାକୁ ବେଖାତିର କରି କୌଣସି କମିଟିର ସଦସ୍ୟ ନ ଥିବା ପ୍ରଣବ ପ୍ରକାଶ ଦାସ ଓରଫ୍ ବବି ବୈଠକରେ ବସି ରହିଥିଲେ। ଯାହାକୁ ନେଇ ବରିଷ୍ଠ ନେତାମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ଏପରିକି ତିନୋଟି କମିଟିରେ ସଦସ୍ୟ ନ ଥିବା ଅନ୍ୟ କିଛି ସଦସ୍ୟ ମଧ୍ୟ ଏହାକୁ ନାପସନ୍ଦ କରିଥିଲେ। ଦେବୀ ମିଶ୍ରଙ୍କୁ ବାରମ୍ବାର ବାହାରିକୁ ଯିବା କଥା କହିବା ଭଲ ଲାଗୁ ନ ଥିଲା। ହେଲେ ଶୃଙ୍ଖଳା ତାଙ୍କୁ ବାଧ୍ୟ କରିଥିଲା। ଗୋଟିଏ ପଟେ ବିଜେପି ସଦସ୍ୟତା ଅଭିଯାନ କରୁଥିବା ବେଳେ, କଂଗ୍ରେସ ପ୍ରତି ସମ୍ବେଦନଶୀଳ ପ୍ରସଙ୍ଗରେ ନିଜ ମତ ସ୍ପଷ୍ଟ କରୁଛି। ମାତ୍ର ବିଜେଡି ଧାରାବାହିକ କାର୍ଯ୍ୟକ୍ରମରୁ ବାହାରି ପାରୁନାହିଁ। ତେଣୁ ବବି ଶୃଙ୍ଖଳାକୁ ଅବଜ୍ଞା କରି ସେଠାରେ ବସି ରହିବା ଖବର ବେଶୀ ପ୍ରଚାର କରାଯାଇନାହିଁ।

ଅନୁରୂପ ଭାବେ ବିଧାୟକ ଅରୁଣ କୁମାର ସାହୁ ସ୍ୱାଧୀନ ଭାବେ ମତବ୍ୟକ୍ତି କରିଥିଲେ। ଯାହା ଅନ୍ୟମାନଙ୍କୁ ପ୍ରଭାବିତ କରିଥିଲା। ଶ୍ରୀ ସାହୁ କହିଥିଲେ ଯେ, ଭୁଲ୍ ହୋଇଛି। ତେଣୁ ପ୍ରତିଟି ଭୁଲକ ତର୍ଜମା ହେଉ। ଠିକ୍ ଭାବେ ତର୍ଜମା ନ ହେଲେ, ଆଗକୁ ବଢିବା କଷ୍ଟକର ହେବ। ତ୍ରୁଟି ସୁଧାରି ଆଗକୁ ବଢିଲେ ଭଲ। ଏ ବର୍ଷ ଜନସମ୍ପର୍କ ପଦଯାତ୍ରା ଭଲ ସେ କରିବା। କିନ୍ତୁ ପଛବର୍ଷ ଗୁଡିକ କଥା ଭୁଲିଯିବା ଉଚିତ ନୁହେଁ। ଅତୀତରେ ଖାମଖିଆଲି ଭାବେ ଏ ଜନସମ୍ପର୍କ ପଦଯାତ୍ରା ହୋଇଛି ନା ନାହିଁ, ସେ ପ୍ରଶ୍ନ ନିଜକୁ ପଚାରିବାକୁ ପଡିବ। ଅରୁଣଙ୍କ ଏହି ମନ୍ତବ୍ୟ ଦଳୀୟ ମହଲରେ ବେଶି ଚର୍ଚ୍ଚାର କାରଣ ହୋଇଛି।

ସେହିପରି ଉପଦେଷ୍ଟା କମିଟି, ସଦସ୍ୟତା ଅଭିଯାନ ଓ କାର୍ଯ୍ୟକ୍ରମ ପରିଚାଳନା କମିଟି ଭିନ୍ନ ଭିନ୍ନ ହୋଇଛି। ତେଣୁ ଯେଉଁ କମିଟି ଯାହାକୁ ଦାୟିତ୍ୱ ଦିଆଯାଇଛି, ସେ ପ୍ରାଥମିକ ରୂପରେଖ ପ୍ରସ୍ତୁତ କରୁ। କମିଟି ଚାହିଁଲେ ଉପଦେଷ୍ଟା କମିଟି କିମ୍ବା ଶୀର୍ଷ ନେତୃତ୍ୱ ହସ୍ତକ୍ଷେପ କରିବ। ଉପଦେଷ୍ଟା କମିଟି ମଧ୍ୟ ଅଯଥା ହସ୍ତକ୍ଷେପରୁ ନିବୃତ୍ତ ରହୁ ବୋଲି ବିଜେଡି ନେତାଙ୍କ ମଧ୍ୟରେ ମତ ପ୍ରକାଶ ପାଇଛି। ଜଣେ ଯୁବ ବିଜେଡି କର୍ମୀ କୁହନ୍ତି ଯେ, ସଞ୍ଜୟ ଦାସବର୍ମା ଓ ଅତନୁ ସବ୍ୟସାଚୀ ନାୟକ ପୂର୍ବରୁ ବିଭିନ୍ନ କମିଟି କରିଛନ୍ତି। ସେମାନେ ତାଲିକା ପ୍ରସ୍ତୁତ କରିବା ଲୋକ। ଶାସନ କଳ ଓ ଦଳ ଦୁଇଟିକୁ ବୁଝିପାରନ୍ତି। ତାଙ୍କ କମିଟିର ସ୍ୱାତନ୍ତ୍ରତା ସେ ବଜାୟ ରଖିପାରିବେ। ଉପଦେଷ୍ଟା କମିଟି ନିଜ ସୀମା ଜାଣୁ।