ଶକ୍ତି ପ୍ରଦର୍ଶନ କରିବେ ଅମରେଶ ଓ ଅମରେନ୍ଦ୍ର…….ବିଜେଡି ଶିବିର ଚଳଚଞ୍ଚଳ..

ଭୁବନେଶ୍ୱର : ବିଜୁ ଜନତା ଦଳରେ ପ୍ରାୟ ଦଶହଜାର ଆଶାୟୀ। ଏକଦା ଦଳର ତିନି ନମ୍ବର ନେତା ପ୍ରଣବ ପ୍ରକାଶ ଦାସ କିଛିଦିନ ତଳେ ଟୁଇଟ୍ କରିଥିଲେ। ୧୪୭ ବିଧାନସଭା, ୨୧ ଲୋକସଭା ଏବଂ ୧୦ ରାଜ୍ୟସଭା ବାଦ୍ ଦେଲେ ଆହୁରି ନଅ ହଜାରୁ ଅଧିକ ଆଶାୟୀ। ମାତ୍ର ପ୍ରତି ନିର୍ବାଚନ ମଣ୍ଡଳୀରେ ହାରାହାରି 3 ଜଣ ପ୍ରମୁଖ ଆଶାୟୀ ରହୁଛନ୍ତି। ଏହି କ୍ରମରେ ଯେଉଁ ଆଶାୟୀମାନଙ୍କର ନିଜସ୍ୱ ସଙ୍ଗଠନ ରହିଛି। ସେମାନେ ନିଜ ନିଜ ତରିକାରେ ଶକ୍ତି ପ୍ରଦର୍ଶନ କରିବା ଆରମ୍ଭ କରିସାରିଲେଣି। ରାଜଧାନୀରେ କିଛିଦିନ ପୂର୍ବରୁ ବିରଞ୍ଚି ମହାସୂପକାର ଏହି ଶକ୍ତି ପ୍ରଦର୍ଶନ କରିଥିଲେ। ଜନସମ୍ପର୍କ ପଦଯାତ୍ରା ସମୟରେ ବର୍ତ୍ତମାନର ରାଜ୍ୟସଭା ସଦସ୍ୟ ଶୁଭାଶିଷ୍ ଖୁଣ୍ଟିଆ ମଧ୍ୟ ଏକ ବିରାଟ ଶକ୍ତି ପ୍ରଦର୍ଶନ କରିଥିଲେ। ଜଗତସିଂହପୁର ଆସନରୁ ଆଶାୟୀ ଅମରେନ୍ଦ୍ର ଦାସ ଏକ କାର୍ଯ୍ୟକ୍ରମ କରିସାରିଛନ୍ତି। ଏହି ସଂଖ୍ୟା ବହୁଳ ଭାବେ ବୃଦ୍ଧି ପାଇବାରେ ଲାଗିଛି। ରବିବାର ତଥା ଆସନ୍ତା କାଲି ଉପକୂଳ ଓଡ଼ିଶାର ଦୁଇ ପ୍ରମୁଖ ଆଶାୟୀ ଶକ୍ତି ପ୍ରଦର୍ଶନ କରିବାକୁ ଯାଉଛନ୍ତି। ରାଜଧାନୀ ଭୁବନେଶ୍ୱର ମଧ୍ୟରେ ଆସୁଥିବା ମଧ୍ୟମ ନିର୍ବାଚନମଣ୍ଡଳୀ ଆଶାୟୀ ତଥା ବରିଷ୍ଠ କର୍ପୋରେଟର ଅମରେଶ ଜେନା ଶକ୍ତି ପ୍ରଦର୍ଶନ କରିବାକୁ ଯାଉଛନ୍ତି। ଅନୁରୂପ ଭାବେ ଜଗତସିଂହପୁର ଜିଲ୍ଲା ନାଉଗାଁ ବ୍ଲକରେ ଅମରେନ୍ଦ୍ର ନିଜର ଶକ୍ତି ପ୍ରଦର୍ଶନ କରିବାକୁ ଯାଉଛନ୍ତି। ଏହି ଦୁଇ ଯୁବ ଆଶାୟୀ ଶକ୍ତି ପ୍ରଦର୍ଶନ ଯଥାକ୍ରମେ ଭୁବନେଶ୍ୱର ଓ ଜଗତସିଂହପୁର ବିଜେଡି ରାଜନୀତିକୁ କେଉଁ ମୋଡ଼ ଦେଉଛି, ତାହା ଉପରେ ସମସ୍ତଙ୍କ ନଜର ରହିବ।