ମେଣ୍ଟ ଚର୍ଚ୍ଚାକୁ ଝୁଲାଇ ରଖିଲେ ଭି.କେ ପାଣ୍ଡିଆନ୍, ଅମିତ ଶାହାଙ୍କ ପରି କଥା ମୋଦି-ନବୀନଙ୍କ ଉପରେ ଛାଡିଲେ …

ଭୁବନେଶ୍ୱର : ପ୍ରଧାନମନ୍ତ୍ରୀ ନରେନ୍ଦ୍ର ଦାମୋଦର ଦାସ ମୋଦିଙ୍କୁ ତୃତୀୟ ଥର କ୍ଷମତାକୁ ଆସିବା ନେଇ ମେଣ୍ଟ ଆବଶ୍ୟକ ନାହିଁ।  ମୋଦିଙ୍କୁ ବିଜେଡିର ସହଯୋଗ ଆବଶ୍ୟକ ନାହିଁ। ଅନୁରୂପ ଭାବେ ନବୀନ ପଟ୍ଟନାୟକଙ୍କୁ ଷଷ୍ଠ ଥର କ୍ଷମତାକୁ ଆସିବା ପାଇଁ ମେଣ୍ଟ ଦରକାର ନାହିଁ। ମେଣ୍ଟ ନେଇ ଯେଉଁ ଆଲୋଚନା ରହିଛି, ତାହା ସାଧାରଣ ରାଜନୈତିକ ଚର୍ଚ୍ଚାରୁ ଉର୍ଦ୍ଧ୍ୱରେ । ଦୁଇଜଣ ଉତ୍ତୃଙ୍ଗ ରାଜନୈତିକ ବ୍ୟକ୍ତିତ୍ୱ ଏକ ବୃହତର ସ୍ୱାର୍ଥ ପାଇଁ ପରସ୍ପରକୁ ସମ୍ମାନ କରନ୍ତି। ଏହା ଥିଲା ବିଜେଡିର ଦ୍ୱିତୀୟ କ୍ଷମତା କେନ୍ଦ୍ର ଭି. କାର୍ତ୍ତିକେୟନ୍ ପାଣ୍ଡିଆନ୍ ମନ୍ତବ୍ୟ। ଯାହା ସେ ମଙ୍ଗଳବାର ମଧ୍ୟାହ୍ନରେ ନିଉଜ୍ 18ରେ ରଖିଛନ୍ତି। ତେଣୁ ବିଜେଡି ଏପର୍ଯ୍ୟନ୍ତ ମେଣ୍ଟ ସମ୍ଭାବନାକୁ ଏଡାଇ ଦେଉନାହିଁ। ଭିକେ ପାଣ୍ଡିଆନଙ୍କ ନୂଆଦିଲ୍ଲୀରେ ରହିଛନ୍ତି। ସେ ଯେଉଁ କାର୍ଯ୍ୟକ୍ରମରେ ଯୋଗ ଦେଇଛନ୍ତି। ସେହି କାର୍ଯ୍ୟକ୍ରମରେ କେନ୍ଦ୍ର ସରକାରଙ୍କ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ମଧ୍ୟ ଯୋଗ ଦେଇଥିଲେ। ଶ୍ରୀ ବୈଷ୍ଣବ ହେଉଛନ୍ତି ସେହି ବ୍ୟକ୍ତିତ୍ୱ ଯିଏ ବିଜେପି ପ୍ରାର୍ଥୀ ତଥା ବିଜେଡି ସହଯୋଗରେ ଦୁଇଥର ରାଜ୍ୟସଭା ସଦସ୍ୟ ହୋଇପାରିଛନ୍ତି। କିଛିଦିନ ତଳେ ମେଣ୍ଟ ସମ୍ପର୍କିତ ନିଷ୍ପତ୍ତି ନେଇ ଇଣ୍ଡିଆ ଟୁଡେ କନକ୍ଲେଭରେ ଅମିତ ଶାହାଙ୍କୁ ମଧ୍ୟ ପ୍ରଶ୍ନ କରାଯାଇଥିଲା। ଏହାର ଉତ୍ତରରେ ସେ ପ୍ରଧାନମନ୍ତ୍ରୀ ମୋଦି ଏବଂ ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ଉପରେ କଥା ଛାଡି ଦେଇଥିଲେ। ଉଭୟ ବିଜେଡି ଓ ବିଜେପିର ଦୁଇ ନମ୍ବର ବ୍ୟକ୍ତି ଭିକେପି ଏବଂ ଅମିତ ଶାହା ଏହି ଚର୍ଚ୍ଚାକୁ ପୂର୍ଣ୍ଣ ବିରାମ ଦେଲେ ନାହିଁ। ତେଣୁ ନରେନ୍ଦ୍ର ମୋଦି ଏବଂ ନବୀନ ପଟ୍ଟନାୟକଙ୍କ ପରବର୍ତ୍ତୀ ବୈଠକ –ସାକ୍ଷାତ-ଭିଡିଓ କଲ୍ ହିଁ ସବୁ ଅପେକ୍ଷାର ଅନ୍ତ ଘଟାଇବ ବୋଲି ରାଜନୈତିକ ସମୀକ୍ଷକ ମାନେ ମତ ଦେଇଛନ୍ତି।