କାହିଁକି ଇଏ  ବିଜେଡିର ତୃତୀୟ କ୍ଷମତାଶାଳୀ  ବ୍ୟକ୍ତି, ଆଗୁଆ ପ୍ରାର୍ଥୀତ୍ୱ ଘୋଷଣା କରି ସଙ୍କେତ ଦେଲା କି ବିଜେଡି…

ଭୁବନେଶ୍ୱର : ବିଜେଡିରେ ମୁଖ୍ୟ କ୍ଷମତା କେନ୍ଦ୍ର ମୁଖ୍ୟମନ୍ତ୍ରୀ ତଥା ଦଳର ସଭାପତି ନବୀନ ପଟ୍ଟନାୟକ। ସେ ଦଳର ଏକ ନମ୍ବର ବ୍ୟକ୍ତି। ବିଜେଡିରେ କିଏ ଦୁଇ ନମ୍ବର, ତାହା ଜଣା ପଡେ ନାହିଁ। କେତେବେଳେ ବିଜୟ ମହାପାତ୍ର ତ ପୁଣି କେତେବେଳେ ପ୍ୟାରୀମୋହନ ମହାପାତ୍ର । ମାତ୍ର ପ୍ରଶାସନିକ ସେବାକୁ ଅବସର ନେଇଥିବା ଭି.କେ ପାଣ୍ଡିଆନ୍ ବିଜେଡିରେ ଯୋଗଦାନ କରିବା ପରେ ଦଳର ଦୁଇ ନମ୍ବର କିଏ, ତାହା ପ୍ରମାଣିତ ହୋଇଯାଇଛି। ନବୀନ ପଟ୍ଟନାୟକ ଦଳର ଏକ ନମ୍ବର କ୍ଷମତାକେନ୍ଦ୍ର ଥିବାବେଳେ ଭି.କେ ପାଣ୍ଡିଆନ୍ ଦୁଇ ନମ୍ବର। ସେହିପରି ଦଳର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ତିନି ନମ୍ବର ବୋଲି କୁହାଯାଉଛି। କଟକ ଜିଲ୍ଲାର ଜଣେ ବରିଷ୍ଠ ବିଧାୟକ ନିଜ ନାମ ଗୋପନ ରଖି କହିଛନ୍ତି ଯେ, ବବି ନୁହଁନ୍ତି, ଶ୍ରୀମୟୀ ମିଶ୍ର ଦଳର ତୃତୀୟ କ୍ଷମତାଶାଳୀ ବ୍ୟକ୍ତି। ଯେଉଁଥି ପାଇଁ ତାଙ୍କ ନାମ ନିର୍ବାଚନର ଯଥେଷ୍ଟ ପୂର୍ବରୁ ଘୋଷଣା କରିଦିଆଗଲା। ଏହି ଘୋଷଣାକୁ ଅଶୋକ ପଣ୍ଡାଙ୍କ ଠାରୁ ଆରମ୍ଭ କରି ବିଭୂତି ବଳବନ୍ତରାୟଙ୍କ କଣ୍ଠରେ ଘୋଷା କରିଦିଆଗଲା। ଏହି ବରିଷ୍ଠ ନେତା ଜଣଙ୍କ କହିଛନ୍ତି ଯେ, ମୁଖ୍ୟମନ୍ତ୍ରୀ ଦୁଇଟି ଆସନରୁ ଲଢିବେ। ହିଞ୍ଜିଳି ସହ କେଉଁଟି ଦ୍ୱିତୀୟ ଆସନ ତାହା ଜଣାପଡିନାହିଁ। ଏହା ପୁରୀ, ବିଜେପୁର, ନର୍ଲା କିମ୍ବା ବରଗଡ ହୋଇପାରେ। ସେହିପରି ଭି.କେ ପାଣ୍ଡିଆନ୍ ମଧ୍ୟ ନିର୍ବାଚନ ଲଢିବେ ନାହିଁ। ଅତନୁ ସବ୍ୟସାଚୀ ନାୟକ ପାଟକୁରା କିମ୍ବା ମହାକାଲପଡ଼ାରୁ ଲଢିବେ, ତାହା ଜଣାନାହିଁ। ଅନୁରୂପ ଭାବେ ପୁଷ୍ପେନ୍ଦ୍ର ସିଂ ଦେଓ କଳାହାଣ୍ଡିରୁ ଲଢିବେ କି ଧର୍ମଗଡ଼ରୁ ଲଢିବେ ତାହା ଜଣାପଡିନାହିଁ। ଅରୁଣ ସାହୁ ନୟାଗଡ଼ ଲଢିବେ ନା ଖଣ୍ଡପଡ଼ା ଲଢିବେ , ତାହା ସ୍ଥିର ହୋଇନାହିଁ। ସଞ୍ଜୟ ଦାସବର୍ମା ବ୍ରହ୍ମଗିରୀରୁ ଲଢିବେ ନା ସତ୍ୟବାଦୀରୁ ଲଢିବେ ତାହା ମଧ୍ୟ ଅଜଣା। ପ୍ରଣବ ପ୍ରକାଶ ଦାସ ଯାଜପୁରରେ ରହିବେ ନା କୋରେଇ ଆସିବେ, ସେ କଥା ସେ କହିପାରିବେ ନାହିଁ ବୋଲି ବରୀର ବିଜେଡି କର୍ମୀମାନଙ୍କୁ କଥାଛଳରେ କହିଛନ୍ତି। ରାଜେନ୍ଦ୍ର ସାହୁ ବେଗୁନିଆରୁ ଲଢିବେ ନା ଖୋର୍ଦ୍ଧା ଫେରିବେ, ତାହା ତାଙ୍କୁ ଜଣାନାହିଁ। ମାତ୍ର ପାଇକ(ଚଷା,ଖଣ୍ଡାୟତ, କୌଳିକ ବୃତ୍ତିଧାରୀ, ଏସଟି,ଏସସି, ସଂଖ୍ୟାଲଘୁ ଜନସଂଖ୍ୟା ବହୁଳ) ଭୁବନେଶ୍ୱର ଲୋକସଭା ପାଇଁ ଜଣେ ସାଧାରଣ ବର୍ଗର ମହିଳାଙ୍କ ନାମ ଘୋଷଣା କରାଗଲା। ତେଣୁ ନବୀନ ଏବଂ ପାଣ୍ଡିଆନଙ୍କ ପରେ ଶ୍ରୀମୟୀ ନିଶ୍ଚିତ ଭାବେ ଦଳରେ କ୍ଷମତାଶାଳୀ  ବୋଲି ପ୍ରମାଣ ଦେବାର କୌଣସି ଆବଶ୍ୟକତା ନାହିଁ ବୋଲି ବିଜେଡି ନେତାଜଣଙ୍କ କହିଛନ୍ତି।