ଯୋଜନା ବୋର୍ଡ ଉପାଧ୍ୟକ୍ଷ ପଦ ହାତେଇବେ କିଏ …….ମନମୋହନ ମାନିବେ ତ……
ଭୁବନେଶ୍ୱର : ବିଜେପି ନେତା ମୋହନ ଚରଣ ମାଝୀଙ୍କ ନେତୃତ୍ୱରେ ରାଜ୍ୟରେ ନୂଆ ସରକାର ଗଠନ ହୋଇଛି। ମୁଖ୍ୟମନ୍ତ୍ରୀଙ୍କ ଅଧିନରେ ଥିବା ଯୋଜନା ଓ ସଂଯୋଜନ ବିଭାଗ ପକ୍ଷରୁ ଯୋଜନା ବୋର୍ଡର ପୁର୍ନଗଠନ ନେଇ କାର୍ଯ୍ୟ ଖସଡ଼ା ପ୍ରସ୍ତୁତି ହେବାରେ ଲାଗିଛି। ଏଥିରେ ସ୍ଥାନ ପାଇବାପାଇଁ ରାଜନେତାଙ୍କ ଠାରୁ ଆରମ୍ଭ କରି ବିଭିନ୍ନ ବର୍ଗର ଲୋକେ ଲବି ମଧ୍ୟ ଆରମ୍ଭ କରିସାରିଛନ୍ତି। ଯୋଜନା ବୋର୍ଡର ଉପାଧ୍ୟକ୍ଷ ପଦ ପାଇଁ କେତେକ ହେଭି୍ୱେଟଙ୍କ ନାଁ ଚର୍ଚ୍ଚା ହେଉଛି, ସେହିପରି ତାହାର ସଦସ୍ୟ ହେବା ପାଇଁ ବହୁ ନେତା ଓ ବୁଦ୍ଧିଜୀବୀ ଆଶା କରୁଛନ୍ତି। ଏହି କ୍ରମରେ ଅଧ୍ୟକ୍ଷ ପଦ ପାଇଁ ରାଜ୍ୟ ବିଜେପି ସଭାପତି ମନମୋହନ ସାମଲ, ପୂର୍ବତନ ବିଧାୟକ ଦିଲ୍ଲୀପ ରାୟ ଏବଂ ନିମାପଡ଼ାର ପୂର୍ବତନ ବିଧାୟକ ସମୀର ରଞ୍ଜନ ଦାଶଙ୍କ ନାଁକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି। ବର୍ତ୍ତମାନ ସ୍ଥିତିରେ ରାଜ୍ୟ ସଭାପତି ଶ୍ରୀ ସାମଲ ଏହି ଦୌଡ଼ରେ ସର୍ବାଗ୍ରେ ରହିଛନ୍ତି।
ଯୋଜନା ବୋର୍ଡକୁ ନେଇ ଥିବା ସରକାରୀ ନିୟମ ଅନୁଯାୟୀ ବୋର୍ଡରେ ଜଣେ ଅଧ୍ୟକ୍ଷ ଓ ଉପାଧ୍ୟକ୍ଷଙ୍କ ବ୍ୟତୀତ ୧୪ ଜଣ ସଭ୍ୟ ଏବଂ ଜଣେ ସଚିବ ରହିବେ । ସାଧାରଣତଃ ରାଜ୍ୟ ଯୋଜନା ବୋର୍ଡର ଅଧ୍ୟକ୍ଷ ପଦରେ ମୁଖ୍ୟମନ୍ତ୍ରୀ ରହିଥାନ୍ତି । ତେବେ ଏହି ପଦବୀରେ ଜଣେ ବେସରକାରୀ ବ୍ୟକ୍ତି ମଧ୍ୟ ରହିପାରିବେ । ସେହିଭଳି ଉପାଧ୍ୟକ୍ଷ ପଦରେ ଜଣେ କ୍ୟାବିନେଟ୍ ମନ୍ତ୍ରୀ କିମ୍ବା କୌଣସି ବେସରକାରୀ ବ୍ୟକ୍ତି ରହିପାରିବେ । ଯିଏ ଉପାଧ୍ୟକ୍ଷ ରହିବେ ତାଙ୍କୁ କ୍ୟାବିନେଟ୍ ପାହ୍ୟା ପ୍ରଦାନ କରାଯାଇ ଆସୁଛି। ବୋର୍ଡର ସଭ୍ୟ ଭାବରେ ଯୋଜନା ଓ ସଂଯୋଜନ ବିଭାଗର ମନ୍ତ୍ରୀ, ମୁଖ୍ୟ ଶାସନ ସଚିବ, ଅତରିକ୍ତ ମୁଖ୍ୟ ଶାସନ ସଚିବ, ଅର୍ଥ ବିଭାଗର ଶାସନ ସଚିବ ରହିବେ । ଏମାନଙ୍କ ସହିତ ସଭ୍ୟ ଭାବେ ବିଶିଷ୍ଟ ଶିକ୍ଷାବିତ୍, ଅର୍ଥନୀତିଜ୍ଞ,ବୈଜ୍ଞାନିକ, ବୈଷୟିକ ଜ୍ଞାନସମ୍ପନ୍ନ ବ୍ୟକ୍ତିଙ୍କ ମଧ୍ୟରୁ ଦୁଇ ଜଣ ରହିବେ । ସେହଭଳି ସମାଜସେବୀ କିମ୍ବା ପ୍ରତିଷ୍ଠିତ ବ୍ୟକ୍ତିଙ୍କ ମଧ୍ୟରୁ ୫ଜଣ ସଭ୍ୟ ଭାବେ ସ୍ଥାନ ପାଇବେ । ବୋର୍ଡର ସଭ୍ୟ ଭାବେ ଜଣେ ଶିଳ୍ପପତି କିମ୍ବା ଶିଳ୍ପ କ୍ଷେତ୍ରରେ ପ୍ରତିଷ୍ଠିତ ବ୍ୟକ୍ତି ରହିବେ । ଏଥି ସହିତ ବିଧାନସଭାର ଦୁଇ ଜଣ ସଦସ୍ୟ ସଭ୍ୟ ପଦରେ ରହିପାରିବେ । ଉନ୍ନୟନ କମିଶନର କିମ୍ବା ଅତିରିକ୍ତ ଉନ୍ନୟନ କମିଶନର ବୋର୍ଡର ସଭ୍ୟ ତଥା ସଚିବ ଭାବେ କାର୍ଯ୍ୟ ତୁଲାଇଥାଆନ୍ତି। ଯୋଜନା ବୋର୍ଡର ଉପାଧ୍ୟକ୍ଷଙ୍କୁ କ୍ୟାବିନେଟ୍ ମନ୍ତ୍ରୀ ପାହ୍ୟାର ସମସ୍ତ ସରକାରୀ ସୁବିଧା ସୁଯୋଗ ଓ ବେତନ ମିଳିଥାଏ । ସେହିଭଳି ପୂର୍ଣ୍ଣକାଳୀନ ସଭ୍ୟମାନେ ମଧ୍ୟ ରାଷ୍ଟ୍ରମନ୍ତ୍ରୀ ପାହ୍ୟାର ସମସ୍ତ ସୁବିଧା ସୁଯୋଗ ପାଇଥାନ୍ତି । ଏମାନଙ୍କୁ ରାଜଧାନୀରେ ସରକାରୀ ବଙ୍ଗଳା ଯୋଗାଇଦେବାର ବ୍ୟବସ୍ଥା ରହିଛି । ସ୍ୱର୍ଗତଃ ବେଦପ୍ରକାଶ ଅଗ୍ରୱାଲ ରାଜ୍ୟ ଯୋଜନା ବୋର୍ଡର ଉପାଧ୍ୟକ୍ଷ ଥିବା ସମୟରେ ୨୦୦୭ ମସିହାରେ ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ରାଜ୍ୟ ଯୋଜନା ବୋର୍ଡର ଶେଷ ବୈଠକ ବସିଥିଲା । ପ୍ରାୟ ୧୭ବର୍ଷ ଧରି ଏହି ବୋର୍ଡର ପୂର୍ଣ୍ଣାଙ୍ଗ ବୈଠକ ବସିନାହିଁ।
