ନିର୍ବାଚନୀ ଭେଳା ବୁଡିବା ପରେ ବିଜେଡିର ମନେ ପଡିଲେ ଆମ୍ବେଦକର …
ଭୁବନେଶ୍ୱର- ଦିନ ଥିଲା ନବୀନ ପଟ୍ଟନାୟକଙ୍କ କଥା ଛାଡନ୍ତୁ। ପାଣ୍ଡିଆନ୍ ଛିଙ୍କିଦେଲେ ଗଣମାଧ୍ୟମରେ ଖବର ହେଉଥିଲା। ହେଲେ ଏବେ ସେପରି ହେଉନାହିଁ। କେତେକ ଗୁରୁତ୍ୱପୂର୍ଣ୍ଣ ଖବର ଏବେ ଲୁଚି ଯାଉଛି। ଗତ ସ୍ୱାଧୀନତା ଦିବସରେ ରାଜ୍ୟପାଳଙ୍କ ପକ୍ଷରୁ ଡକାଯାଇଥିବା ନୈଶ୍ୟ ଭୋଜି ବିରୋଧୀ ଦଳ ନେତା ନବୀନ ପଟ୍ଟନାୟକ ଯାଇ ନ ଥିଲେ। ଏହା ରଘୁବର ଦାସଙ୍କ ପୁତ୍ର ଓ ସହଯୋଗୀଙ୍କ ଦ୍ୱାରା ଓଡ଼ିଆ ଏଏସଓ ମାଡ ଘଟଣାର ପ୍ରତିବାଦ ଥିଲା। ମାତ୍ର କେହି ଏହାକୁ ଖବରଟିଏ କଲେ ନାହିଁ। କାରଣ ବିଜେଡି ଆଭିମୁଖ୍ୟ ସ୍ପଷ୍ଟ ନ ଥିଲା। ଠିକ୍ ଏହା ଭିତରେ ବିଜେଡି ବିଧାୟକମାନଙ୍କ ଏକ ପ୍ରଶିକ୍ଷଣ ଶିବିର ଦଳୀୟ କାର୍ଯ୍ୟାଳୟରେ ଅନୁଷ୍ଠିତ ହୋଇଯାଇଛି। ଏହିଦିନ ଏକ ବିରଳ ଦୃଶ୍ୟ ଦେଖିବାକୁ ମିଳିଲା । ବିଜୁ ପଟ୍ଟନାୟକଙ୍କ ସହ ବାବା ସାହେବ ଭୀମ ରାଓ ଆମ୍ବେଦକରଙ୍କ ଫଟୋ ରଖାଯାଇଥିଲା। ଏଥିରେ ସମସ୍ତେ ଫୁଲମାଳ ଦେଲେ। ଅବଶ୍ୟ ନିର୍ବାଚନ ପୂର୍ବରୁ ବରମୁଣ୍ଡା ବସଷ୍ଟାଣ୍ଡର ନାମକରଣ ବାବାସାହେବଙ୍କ ନାଁରେ କରାଯାଇଥିଲା।
ଆମ୍ବେଦକରଙ୍କ ପ୍ରଣୀତ ସାମାଜିକ ନ୍ୟାୟକୁ ନବୀନ ପଟ୍ଟନାୟକ ଘୋର ବିରୋଧ କରନ୍ତି। ଏକଥା ତାଙ୍କ ଦଳର ଯେ କୌଣସି ନେତାଙ୍କୁ ପଚାରିଲେ କହିପାରିବେ। ଆମ୍ବେଦକରଙ୍କ ନାଁରେ ବସଷ୍ଟାଣ୍ଡ କରିବା କେତେକ ସାମାଜିକ କର୍ମୀ ମତ ଦେଇଥିଲେ। ଭିକେ ପାଣ୍ଡିଆନ ମଧ୍ୟ ଏଥିରେ ସମ୍ମତି ପ୍ରକାଶ କରିଥିଲେ। ନିର୍ବାଚନ ପୂର୍ବରୁ ଆଦିବାସୀ ଭୋଟ ବିଜେଡି ଠାରୁ ଖସି ସାରିଥିଲା। ଏହି ଭୋଟ ପାଇଁ ବିଜେପି ବ୍ୟାପକ ରଣକୌଶଳ ପ୍ରସ୍ତୁତ କରିଥିଲା। ଦକ୍ଷିଣ ଓଡ଼ିଶାରେ କଂଗ୍ରେସର ମଧ୍ୟ ଆଦିବାସୀ ଭୋଟ୍ ବ୍ୟାଙ୍କ୍ ସୁଦୃଢ ରହିଛି। ତେଣୁ ବିଜେଡି ଏକମାତ୍ର ଦାବିଦାର ହୋଇ ରହିନାହିଁ। ଏହା ପରେ ଅନୁସୂଚିତ ଜାତି ଭୋଟ ଉପକୂଳ ଓଡ଼ିଶାରେ ଦଳ ସହ ରହିଛି। ମାତ୍ର ଏକ ପ୍ରଭାବୀ ପ୍ରତିଶତ ବିଜେପି ମୁହାଁ ହୋଇଛି। ପଛୁଆବର୍ଗ ଭୋଟ ମଧ୍ୟ ବିଜେପି ମୁହାଁ ହୋଇଛି। ବ୍ୟାପକ ପରିମାଣରେ ବିଭିନ୍ନ ବର୍ଗ ବିଶେଷର ବୈଠକ ବିଜେପି ଦ୍ୱାରା କରାଯାଇଛି। ପଛୁଆବର୍ଗର ସଂରକ୍ଷଣ କଥା ଉଠାଯାଇଛି, ମାତ୍ର ବିଜେଡିଏହାକୁ ହାଲୁକା ଭାବେ ନେଇଥିଲେ।
ଆଶ୍ଚର୍ଯ୍ୟର କଥା ରାଜ୍ୟର ଅଧା ଜନସଂଖ୍ୟା ଥିବା ପଛୁଆବର୍ଗର ଗୋଟିଏ ସ୍ୱତନ୍ତ୍ର ଶାଖା ବିଜେଡିର ନାହିଁ। 24 ବର୍ଷ ମଧ୍ୟରେ ଗୋଟିଏ କମିଟିଟିଏ ହୋଇପାରିଲା ନାହିଁ। ଅଧିକାରୀ କୈନ୍ଦ୍ରିକ ତଥାକଥିତ ପଛୁଆବର୍ଗ ସର୍ଭେକ୍ଷଣକୁ ପ୍ରଶାସନର ଉଚ୍ଚ ବର୍ଗର ଅଧିକାରୀ ଦିଶାହୀନ କରି ଦେଇ ଥିଲେ। ଯାହା ଫଳରେ ପ୍ରାୟ 10 ପ୍ରତିଶତ ତଥ୍ୟଗତ ତ୍ରୁଟି ପ୍ରକାଶ ପାଇଲା। ଏହି ରିପୋର୍ଟ ଥାଇ ମଧ୍ୟ ବିଜେଡି ଘୋଷଣା କରିପାରିଲା ନାହିଁ.। ବିଜେପି ସରକାର ଆସିବା କ୍ଷଣି ଆଦିବାସୀ ବର୍ଗରୁ ମୁଖ୍ୟମନ୍ତ୍ରୀ କରିଥିଲା। ଏହା ସହିତ ଜଣେ ଖଣ୍ଡାୟତ ବର୍ଗର ମହିଳା ଉପ ମୁଖ୍ୟମନ୍ତ୍ରୀ ହୋଇଥିଲେ। ଓଡ଼ିଶାକୁ ପ୍ରାୟ ସାଢେ ଚାରି ଦଶନ୍ଧି ଧରି ଶାସନ କରିଥିବା କରଣ ବର୍ଗର ଗୋଟିଏ ପ୍ରତିନିଧି ମନ୍ତ୍ରିମଣ୍ଡଳରେ ନାହାନ୍ତି। ତେଣୁ ସବୁ ବର୍ଗର ଭୋଟର ଧୀରେ ଧୀରେ ବିଜେଡି ହାତରୁ ଖସିବାରେ ଲାଗିଲେ।
ଏହା କେବଳ ବିଜେପିରେ ସୀମିତ ରହିଲା ନାହିଁ। ଏଆଇସିସି ମଧ୍ୟ ସାମାଜିକ ନ୍ୟାୟ କଥା କହିବା ଆରମ୍ଭ କରିଛି। ଅତୀତରେ ସବୁ ଭୁଲ୍ ବୁଝିଆଭିମୁଖ୍ୟରେ ପରିବର୍ତ୍ତନ କରିଛି। କଂଗ୍ରେସ ଗଠନ କରିଥିବା ଷ୍ଟିଅରିଂ କମିଟିରେ ଶ୍ରୀକାନ୍ତ ଜେନାଙ୍କ ନାମ ଦଳକୁ ନୀତିଗତ ଦିଗରେ ସ୍ପଷ୍ଟତା ଆଣିଛି। ଜାରି ରହିଥିବା ବିଧାନସଭା ଅଧିବେଶନରେ କଂଗ୍ରେସ ଦଳ ଆଣୁଥିବା ମୁଲତବୀ ପ୍ରସ୍ତାବ ଓ ସଂରକ୍ଷଣ ସମ୍ପର୍କିତ କଥାକୁ କେହି କାଟି ପାରୁନାହାନ୍ତି। ବିଜେପିର ଏସସି,ଏସଟି ଏମଏଲଏ ଏହାକୁ ନେଇ ଦଳ ଉପରେ ଚାପ ପକାଉଛନ୍ତି। ବିଜେଡି ଓ କଂଗ୍ରେସର ସାଧାରଣ ବର୍ଗର ନେତା ସାମାଜିକ ନ୍ୟାୟ କଥାରେ ଗୃହକୁ ଅଚଳ କରୁଛନ୍ତି। ତେଣୁ ବିଜେଡି ନିଜର ଆଭିମୁଖ୍ୟ ସ୍ପଷ୍ଟ କରିପାରୁନାହିଁ। କାରଣ ବିଜେଡି ହାରିବା ପରେ ବିରୋଧୀ ଦଳ ନେତା, ଉପ ନେତା, ଷ୍ଟିଅରିଂ କମିଟି ଅଧ୍ୟକ୍ଷ ଏବଂ ବିରୋଧୀ ଦଳ ନେତାଙ୍କ ସଚିବ ପଦ ସାଧାରଣ ବର୍ଗକୁ ଦେଇଛି। ଯାହା ଏକ ରଣନୈତିକ ବାଚାଲାମୀ।
ଆଗାମୀ ଦିନରେ ଏହି ସଙ୍କଟକୁ ଲକ୍ଷ୍ୟ କରି ଦଳର ଦୁଇ ବରିଷ୍ଠ ନେତା ନୀତିଗତ ଦିଶା ଦେଖାଇବାରେ ଏକ ପ୍ରୟାସ ଆରମ୍ଭ କରିଛନ୍ତି। ଏହାକୁ ସାମଗ୍ରିକ ଭାବେ ବିଜେଡିର ଆଭିମୁଖ୍ୟ କହିବା ଭୁଲ୍ ହେବ। ଏହି ଦୁଇ ନେତା ହେଉଛନ୍ତି-ରଣେନ୍ଦ୍ର ପ୍ରତାପ ସ୍ୱାଇଁ ଏବଂ ଡକ୍ଚର ଅରୁଣ କୁମାର ସାହୁ। ଏସଟିଏସିପଛୁଆବର୍ଗ ବିକାଶ ଖର୍ଚ୍ଚଦାବି ଆଲୋଚନାରେ ଶ୍ରୀ ସ୍ୱାଇଁ ଭାଷଣ ଏବଂ ଉଚ୍ଚଶିକ୍ଷା ସମ୍ପର୍କିତ ସଂରକ୍ଷଣ ମୁଲତବୀ ଆଲୋଚନା ଅରୁଣ ସାହୁଙ୍କ ବକ୍ତବ୍ୟ ଏବେ ଚର୍ଚ୍ଚାର କାରଣ ହୋଇଛି। ଅରୁଣଙ୍କ ଭିଡିଓ କେବଳ ବିଜେଡି ନୁହେଁ ବିଜେପି ବିଧାୟକଙ୍କ ମୋବାଇଲରେ ମଧ୍ୟ ଖେଳୁଛି। ତେଣୁ ବିଜେଡି ପୂର୍ବ ଭୁଲ୍ ସୁଧାରି ଆମ୍ବେଦକରଙ୍କୁ ଆଡକୁ ଢଳିବାକୁ ଚେଷ୍ଟା କରିଛି। ସମୟ କହିବ ସାମାଜିକ ନ୍ୟାୟ ପାଇଁ ବିଜେଡିର ଆନ୍ତରିକତା କେତେ?
