କାହିଁକି କଣ୍ଟାବାଞ୍ଝିକୁ ବାଛିଲେ ନବୀନ ପଟ୍ଟନାୟକ…କେତେ ଫଳପ୍ରଦ ହେବ ଏହି ଯୋଜନା…

ଭୁବନେଶ୍ୱର : ରାଜ୍ୟରେ ଲଗାତର ପଞ୍ଚମ ଥର ବିଜେଡି ନିର୍ବାଚନ ଜିତି ସାରିଛି। ଷଷ୍ଠ ଥର ଜିତି ରେକର୍ଡ଼ କରିବ ବୋଲି ଆଶାବାଦୀ ରହିଛି। ମାତ୍ର ଅବିଭକ୍ତ ବଲାଙ୍ଗୀର ଜିଲ୍ଲାରେ ସାମଗ୍ରିକ ପ୍ରଦର୍ଶନ ଓ ସାମ୍ପ୍ରତିକ ରାଜନୈତିକ ସ୍ଥିତି ବିଜେଡିର ରଣନୀତି ପରିବର୍ତ୍ତନ କରିଛି। ଏହି କ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦ୍ୱିତୀୟ ଥର ପଶ୍ଚିମ ଓଡ଼ିଶାରୁ ଲଢିବାକୁ ଯାଉଛନ୍ତି। ସେ ବିଜେପୁର,ବରଗଡ଼, ନର୍ଲା  କି ରେଢାଖୋଲରୁ ପ୍ରାର୍ଥୀ ହୋଇ ନାହାନ୍ତି।  ଆଜି ବିଜେଡ଼ିର ପଞ୍ଚମ ପ୍ରାର୍ଥୀ ତାଲିକା ଘୋଷଣା କରାଯାଇଛି। ତାଲିକାରେ ୯ ଜଣ ପ୍ରାର୍ଥୀଙ୍କ ନାମ ଘୋଷଣା କରାଯାଇଛି। କଣ୍ଟାବାଞ୍ଚିରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲଢ଼ିବେ ବୋଲି ନବୀନ ନିଜେ ଘୋଷଣା କରିଛନ୍ତି। ଗତ ନିର୍ବାଚନରେ ଏହି ଜିଲ୍ଲାର ଫଳାଫଳକୁ ମିଶ୍ରିତ ବୋଲି ବିଜେଡି ଶୀର୍ଷ ନେତୃତ୍ୱ ବିଚାର କରୁଥିଲା। ଏହି ଜିଲ୍ଲାରୁ ବିଜେପି ଏମପି ସହ ଗୋଟିଏ ବିଧାନସଭା ସିଟ୍ ହାତେଇଥିଲା। ଅନୁରୂପ ଭାବେ କଂଗ୍ରେସ ମଧ୍ୟ ଦୁଇଟି ବିଧାନସଭା ଆସନ ହାତେଇଥିଲା। ସୋନପୁର ଜିଲ୍ଲାରେ ବିଜେଡିରେ ସାଂସଦ ପ୍ରାର୍ଥୀ ଲକ୍ଷ୍ୟ ଅନୁସାରେ ଭୋଟ୍ ପାଇଲେ ନାହିଁ। ଯଦି ଏପରି ହୋଇଥାନ୍ତା, ତେବେ ବିଜେଡି ଏମପି ପ୍ରାର୍ଥୀ କଳିକେଶ ଜିତିପାରିଥାନ୍ତେ। ତେଣୁ କଂଗ୍ରେସ ନେତା ସୁରେନ୍ଦ୍ର ସିଂ ଭୋଇଙ୍କୁ ଆଣି ସାଂସଦ ଜିତିବାକୁ ବିଜେଡି ଗୁରୁତ୍ୱ ଦେଉଛି ବୋଲି ଏକ ବାର୍ତ୍ତା ଦିଆଯାଉଛି। ଜିଲ୍ଲାରେ ଅପେକ୍ଷାକୃତ ସଶକ୍ତ ଥିବା କଂଗ୍ରେସ ଓ ବିଜେପିରୁ ଜିଲ୍ଲାରୁ ଆସନ ଶୂନ୍ କରିବାକୁ ଏକ ରଣନୀତି ପ୍ରସ୍ତୁତ କରାଯାଇଛି। ନରସିଂହମିଶ୍ର, ସନ୍ତୋଷ ସିଂ ସାଲୁଜା, କେଭି ସିଂଦଓ ବିଜେଡିର ଭଲ ସମୟରେ ମଧ୍ୟ ଏକାଧିକ ଥର ଜିତିଥିବା ନଜିର ରହିଛି। ସେହିପରି ବଲାଙ୍ଗୀର ଜିଲ୍ଲାକୁ ସୋନପୁର, କଳାହାଣ୍ଡି, ବୌଦ୍ଧ,ନୂଆପଡା ଏବଂ ବରଗଡ଼ ଜିଲ୍ଲା ପାଖାପାଖି ରହିଛି। ଏହା ଦ୍ୱାରା ଏହି ସାମଗ୍ରିକ ଅଞ୍ଚଳରେ ଏକ ପ୍ରଭାବ ପଡିବ ବୋଲି ବିଜେଡି ନେତୃତ୍ୱ ଆଶା କରୁଛି। କଳାହାଣ୍ଡି, ବଲାଙ୍ଗୀର ଏବଂ ବରଗଡ଼ ଲୋକସଭାରେ ଏହି ପ୍ରାର୍ଥୀ ଚୟନର ପ୍ରଭାବ ପଡିବ ବୋଲି ବିଜେଡି ଆଶା କରୁଛି।

ଉଲ୍ଲେଖଯୋଗ୍ୟ, ଘୋଷଣା କରାଯାଇଥିବା ତାଲିକାରେ ଚିତ୍ରକୋଣ୍ଡା ବିଧାନସଭା ଆସନରୁ ଲକ୍ଷ୍ମୀପ୍ରିୟା ନାୟକଙ୍କୁ ପ୍ରାର୍ଥୀ କରାଯାଇଛି। ସେହିପରି ପଦ୍ମପୁରରୁ ବର୍ଷା ସିଂ ବରିହା, କୁଚିଣ୍ଡାରୁ ରାଜେନ୍ଦ୍ର ଛତ୍ରିଆ, ଦେବଗଡ଼ରୁ ଅରୁନ୍ଧତି ଦେବୀ, ଅନୁଗୁଳରୁ ସଂଯୁକ୍ତା ସିଂହ, ନିମାପଡ଼ାରୁ ଦିଲ୍ଲୀପ ନାୟକ, ସାନଖେମୁଣ୍ଡିରୁ ସୁଲକ୍ଷଣା ଗୀତାଞ୍ଜଳି ଦେବୀ ଏବଂ ଜୟପୁରରୁ ଇନ୍ଦିରା ନନ୍ଦଙ୍କୁ ପ୍ରାର୍ଥୀ କରାଯାଇଛି। ଦଳପକ୍ଷରୁ ୩ ଜଣ ବିଧାୟକଙ୍କ ଟିକେଟ କଟା ଯାଇଛି। ନିମାପଡ଼ାରେ ସମୀର ଦାସଙ୍କ ଟିକେଟ କଟାଯାଇଛି। ନିମାପଡ଼ାରେ ଦଳ ପକ୍ଷରୁ ଦିଲ୍ଲୀପ ନାୟକଙ୍କୁ ପ୍ରାର୍ଥୀ କରାଯାଇଛି। ସେହିପରି କୁଚିଣ୍ଡାର ସିଟିଂ ବିଧାୟକ କିଶୋର ନାୟକଙ୍କ ଟିକେଟ କଟିଛି। ତାଙ୍କ ବଦଳରେ ରାଜେନ୍ଦ୍ର ଛତ୍ରିଆଙ୍କୁ ବିଜେଡ଼ି ପକ୍ଷରୁ ପ୍ରାର୍ଥୀ କରାଯାଇଛି। ସେହିପରି ଚିନ୍ତାକୋଣ୍ଡାରୁ ପୂର୍ଣ୍ଣଚନ୍ଦ୍ର ବାକାଙ୍କ ଟିକେଟ କଟିଛି। ତାଙ୍କ ସ୍ଥାନରେ ଲକ୍ଷ୍ମୀପ୍ରିୟା ନାୟକଙ୍କୁ ପ୍ରାର୍ଥୀ କରାଯାଇଛି। ଉଲ୍ଳେଖଯୋଗ୍ୟ, ଅରୁନ୍ଧତି ଦେବୀ ଓ ଦିଲ୍ଲୀପ ନାୟକ ନିକଟରେ ବିଜେପି ଛାଡ଼ି ବିଜେଡିରେ ଯୋଗ ଦେଇଥିଲେ। ସେହିପରି ରାଜେନ୍ଦ୍ର ଛତ୍ରିଆ ମଧ୍ୟ ଦଳ ଡେଇଁ ନିକଟରେ ବିଜେଡିରେ ସାମିଲ ହୋଇଥିଲେ। ଏହି ପ୍ରାର୍ଥୀମାନଙ୍କ ନାମ ଘୋଷଣା ସହ ବିଜେଡି ଏପର୍ଯ୍ୟନ୍ତ ୧୨୬ ଆସନରେ ମୋଟ ୨୮ ଜଣ ମହିଳାଙ୍କୁ ପ୍ରାର୍ଥୀ କରି ସାରିଲାଣି ।