ଦୀପାଳିଙ୍କୁ ଆଶ୍ୱସ୍ତି: ତ୍ରୁଟି ସଂଶୋଧନ କରିବାକୁ ଅନୁମତି ଦେଲେ ହାଇକୋର୍ଟ

ଭୁବନେଶ୍ୱର :(ସୁରେନ୍ଦ୍ର ବାରିକ)-ଦୀପାଳି ଦାସଙ୍କ ନିର୍ବାଚନୀ ଆବେଦନ ଖାରଜ ହେବନି: ଟଙ୍କଧରଙ୍କ ଆବେଦନକୁ ଅଗ୍ରାହ୍ୟ କଲେ ହାଇକୋର୍ଟ
➡️ ଫର୍ମ-୨୫ ସତ୍ୟପାଠରେ ତ୍ରୁଟି ସଂଶୋଧନଯୋଗ୍ୟ, ଆରମ୍ଭରୁ ଆବେଦନ ଖାରଜ ହୋଇପାରିବ ନାହିଁ; ଓଡ଼ିଶା ହାଇକୋର୍ଟଙ୍କ ଗୁରୁତ୍ୱପୂର୍ଣ୍ଣ ନିଷ୍ପତ୍ତି

ଝାରସୁଗୁଡ଼ା ବିଧାୟକ ଟଙ୍କଧର ତ୍ରିପାଠୀଙ୍କ ଦ୍ୱାରା ଦାୟର କରାଯାଇଥିବା ଆନ୍ତଃବର୍ତ୍ତୀକାଳୀନ ଆବେଦନ (I.A. No.111 of 2024) କୁ ଓଡ଼ିଶା ଉଚ୍ଚ ନ୍ୟାୟାଳୟ ଅଗ୍ରାହ୍ୟ କରିଦେଇଛନ୍ତି । ଏଥିସହିତ ଦୀପାଳି ଦାସଙ୍କ ନିର୍ବାଚନୀ ପିଟିସନକୁ ପ୍ରାରମ୍ଭିକ ପର୍ଯ୍ୟାୟରେ ଖାରଜ କରିବା ପାଇଁ ହୋଇଥିବା ପ୍ରୟାସ ବିଫଳ ହୋଇଛି ।

ଗତ ୨୦୨୪ ସାଧାରଣ ନିର୍ବାଚନ ପରେ Deepali Das  ନିର୍ବାଚନକୁ ଚ୍ୟାଲେଞ୍ଜ କରି  ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ତେବେ ଏହି ନିର୍ବାଚନୀ ଆବେଦନରେ ଥିବା କେତେକ ବୈଷୟିକ ତ୍ରୁଟି ଓ ‘ଦୁର୍ନୀତିପୂର୍ଣ୍ଣ ଆଚରଣ’ (corrupt practices) ସମ୍ପର୍କିତ ପିଟିସନର ବିଧିବଦ୍ଧତାକୁ ନେଇ Tankadhar Tripathy  ଏକ ପୃଥକ ଆବେଦନ କରିଥିଲେ । ତାଙ୍କର ଯୁକ୍ତି ଥିଲା ଯେ, ଆବେଦନଟି ନିର୍ଦ୍ଧାରିତ ‘ଫର୍ମ-୨୫’ ଅନୁଯାୟୀ ହୋଇନଥିବାରୁ ଏହାକୁ ସମ୍ପୂର୍ଣ୍ଣ ଭାବେ ଖାରଜ କରାଯାଉ ।

ଜଷ୍ଟିସ ଶଶିକାନ୍ତ ମିଶ୍ରଙ୍କୁ ନେଇ ଗଠିତ ଏକକ ପୀଠ ଏହି ମାମଲାର ଶୁଣାଣି କରି ସ୍ପଷ୍ଟ କରିଛନ୍ତି ଯେ, ନିର୍ବାଚନୀ ଆବେଦନରେ ଥିବା ତ୍ରୁଟିଗୁଡ଼ିକ ସଂଶୋଧନ ଯୋଗ୍ୟ । କେବଳ ବୈଷୟିକ ତ୍ରୁଟି ପାଇଁ ଜଣେ ପ୍ରାର୍ଥୀଙ୍କ ମୂଳ ଆବେଦନକୁ ଖାରଜ କରାଯାଇପାରିବ ନାହିଁ । କୋର୍ଟ କହିଛନ୍ତି ଯେ:
• ନିର୍ବାଚନୀ ଆବେଦନକାରୀ (ଦୀପାଳି ଦାସ) ଚାହିଁଲେ ଏକ ପରିପୂରକ ସତ୍ୟପାଠ (Supplementary Affidavit) ଦାଖଲ କରି ତ୍ରୁଟି ସୁଧାରି ପାରିବେ ।

• ଏହି ତ୍ରୁଟି ସଂଶୋଧନ ପାଇଁ ସମୟସୀମା ବାଧକ ସାଜିବ ନାହିଁ ।
• ଉଭୟ ପକ୍ଷଙ୍କ ସହମତି ଭିତ୍ତିରେ କେତେକ ଅନାବଶ୍ୟକ ତଥ୍ୟକୁ ପିଟିସନରୁ ବାଦ୍ ଦିଆଯିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି ।

ଏହି ଗୁରୁତ୍ୱପୂର୍ଣ୍ଣ ରାୟ ପରେ ମାମଲାର ପରବର୍ତ୍ତୀ ଶୁଣାଣି ପାଇଁ ଆସନ୍ତା ୨୦୨୬ ଫେବୃଆରୀ ୨୫ ତାରିଖ ଧାର୍ଯ୍ୟ କରାଯାଇଛି । ସେହିଦିନ ଉଭୟ ପକ୍ଷ ସଂଶୋଧିତ ଦସ୍ତାବେଜ ଦାଖଲ କରିବା ସହ ଅନ୍ୟ ଏକ ଆବେଦନ (I.A. No.64 of 2025) ଉପରେ ଶୁଣାଣି ହେବାର କାର୍ଯ୍ୟକ୍ରମ ରହିଛି ।ଏହି ମାମଲାରେ ଟଙ୍କଧର ତ୍ରିପାଠୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ଜି.କେ. ଅଗ୍ରୱାଲ ଏବଂ ଦୀପାଳି ଦାସଙ୍କ ପକ୍ଷରୁ ବରିଷ୍ଠ ଆଇନଜୀବୀ ବିଦ୍ୟାଧର ମିଶ୍ର ପକ୍ଷ ରଖୁଥିଲେ । ହାଇକୋର୍ଟଙ୍କ ଏହି ନିଷ୍ପତ୍ତି ପରେ ଏବେ ମୂଳ ନିର୍ବାଚନୀ ମାମଲା (Election Petition) ର ବିଚାର ପ୍ରକ୍ରିୟା ଆଗକୁ ବଢ଼ିବ ।